મુંબઇ

જાસ્મિન ભસીનના ફેન્સને એ વાત જાણીને આનંદ થશે કે તે ફરીથી 'બિગ બોસ 14'ના ઘરમાં જવાની છે. હકીકતમાં, બે અઠવાડિયા પહેલા જાસ્મિનને ઘરમાંથી બહાર કરાયા બાદ તેના ફેન્સ તેને શોમાં પાછી લાવવા માટે મેકર્સને સતત વિનંતી કરી રહ્યા હતા. ત્યારે એક્ટ્રેસ ફરીથી એક અઠવાડિયા માટે ઘરમાં જવા તૈયાર છે.

દરેક સીઝનની જેમ, મેકર્સ આ વખતે પણ તેમના ફેવરિટ કન્ટેસ્ટન્ટને સપોર્ટ કરવા માટે કોઈને ઘરની અંદર લાવવાના છે. તેથી, જાસ્મિન પણ શો પર બોયફ્રેન્ડ અલી ગોનીને સપોર્ટ કરવા માટે અંદર જશે. આ બધાની શરુઆત ત્યારે થઈ જ્યારે ઈમોશનલી રીતે નાજુક સ્થિતિમાં રહેલી જાસ્મિનને સપોર્ટ કરવા માટે અલી રિયાલિટી શોમાં જવા સંમત થયો હતો. તેણે દાવો કર્યો હતો કે, તે સ્પર્ધા માટે નહીં પરંતુ ફક્ત જાસ્મિનને ટેકો આપવા માટે અંદર જઈ રહ્યો છે. પોતાના શબ્દોને વળગી રહેતા, એલિમિનેશન ટાસ્ક દરમિયાન તેણે જાસ્મિન સામે ઘર બહાર નીકળવાનું પસંદ કર્યું હતું. તે થોડા અઠવાડિયા બાદ ફરી પાછો આવ્યો હતો અને બંને નજીક આવ્યા હતા તેમજ તેમના સંબંધો મજબૂત બન્યા હતા. જો કે, બે અઠવાડિયા પહેલા જાસ્મિનને બહાર થઈ ત્યારે અલી ભાંગી પડ્યો હતો. પરંતુ હવે, ઘરની અંદર ફરીથી તેઓ ભેગા થશે.

શો સાથે સંકળાયેલા સૂત્રોએ જણાવ્યું છે કે, '30મી જાન્યુઆરીથી એક અઠવાડિયા માટે જાસ્મિનને ક્વોરન્ટિ કરાશે. જરૂરી ક્વોરન્ટિન સમયગાળો પૂરો થયા બાદ, ફેમિલી વીક માટે એક અઠવાડિયા પૂરતું તે ઘરમાં જશે. લોકોને જાસ્મિન અને અલીની જોડી ગમે છે અને તેઓ જ જાસ્મિનને પાછા લાવવાની માગ કરી રહ્યા છે. આમ તેઓ જાસ્મિન અને અલીનો વચ્ચેનો વધુ રોમાન્સ જોવા માગે છે. જાસ્મિન અલી માટે ઘરમાં જશે'.

બીજી તરફ એવું પણ જાણવા મળ્યું છે કે, રાખી સાવંતનો પતિ રિતેશ કે જે અત્યારસુધી ક્યારેય પણ જાહેરમાં જોવા મળ્યો નથી. તે તેની રાખીને સપોર્ટ કરવા માટે ઘરમાં આવશે. મનુ પંજાબી કે જે હેલ્થ ઈશ્યૂના કારણે શોને અધવચ્ચેથી છોડીને જતો રહ્યો હતો કે દેવોલીના ભટ્ટાચાર્જીને સપોર્ટ કરશે. દેવોલીના એજાઝ ખાનની પ્રોક્ષીમાં બિગ બોસના ઘરમાં ગઈ છે. એજાઝ જ્યારે ઘરમાં હતો ત્યારે મનુ તેની સાથેની તેની મિત્રતા ગાઢ બની હતી.