કોલકાતા-

વિધાનસભાની ચૂંટણીની તૈયારી કરી રહેલા બંગાળ માટે રવિવાર ઉત્સાહથી ભરપુર રહેશે. વડા પ્રધાન નરેન્દ્ર મોદી બપોરે 2 વાગ્યે કોલકાતાના બ્રિગેડ ગ્રાઉન્ડ ખાતે મેગા રેલી કરશે. આ રેલીમાં અભિનેતા મિથુન ચક્રવર્તી ઉપસ્થિત રહેશે. આ રેલીમાં મિથુનની ભાગીદારી ભાજપના બંગાળના પ્રભારી કૈલાસ વિજયવર્ગીયાએ આપી છે. આજે મમતા સિલિગુડી અને દાર્જિલિંગમાં પણ રેલી કરશે.

ભાગવત મુંબઈમાં મિથુનને મળ્યા હતા

મિથુન ભાજપમાં જોડાવાની અટકળો ત્યારે જ શરૂ થઈ હતી જ્યારે સંઘના વડા મોહન ભાગવત ગયા મહિને તેમના મુંબઇ ઘરે ગયા હતા. અહેવાલો અનુસાર મિથુન ચક્રવર્તી ઓક્ટોબર 2019 માં નાગપુરની મુલાકાતે આવ્યા હતા. આ સમય દરમિયાન તેઓ સંઘના વડા મોહન ભાગવતને મળ્યા હતા અને તેમને ઘરે આવવાનું આમંત્રણ આપ્યું હતું.

રાજકીય નિષ્ણાતોના મતે, અભિનેતા તરીકે મિથુનની બંગાળમાં ઘણી લોકપ્રિયતા છે. તેનો લાભ લઈને ભાજપ તેમને ઉમેદવાર બનાવી શકે છે. જોકે, મિથુન હજી ભાજપમાં જોડાયા નથી અને આજની રેલીમાં ચિત્ર સ્પષ્ટ થઈ શકે છે.


Comments

કોમેન્ટ પોસ્ટ કરવા માટે લાગિન કરો