મુંબઈ-

શેરબજારમાં ઊંચા મથાળે ફંડોની નફારૂપી વેચવાલીનું દબાણ જોવા મળતા સેન્સેક્સમાં 186 પોઈન્ટનો ઘટાડો થયો છે. બીએસઈ સેન્સેક્સ મંગળવારે કામકાજના અંતે 185.93 પોઈન્ટ ઘટીને 52,549.66ની સપાટીએ બંધ રહ્યો હતો. નિફ્ટી આંક પણ 66.25 પોઈન્ટ ગગડીને 15,800ની નીચે 15,748.45 પર બંધ હતો. લાર્જકેપ શએરો કોટક મહિન્દ્રા બેન્કમાં સૌથી વધુ એક ટકાનું ધોવાણ થયું હતું. આઈસીઆઈસીઆઈ બેન્ક, ટેક મહિન્દ્રા, બજાજ ઓટો, મહિન્દ્રા એન્ડ મહિન્દ્રા, એસબીઆઈ અને એક્સિસ બેન્કમાં પણ નફારૂપી વેચવાલીનું દબાણ હાવી રહ્યું હતું.

બીજીતરફ પાવરગ્રીડ, એચયુએલ, એનટીપીસી, ડો. રેડ્ડી અને નેસ્લે ઈન્ડિયામાં સુધારો હતો. નિષ્ણાતોના મતે નાણાકીય શેરોમાં ઊંચા મથાળેથી નફારૂપી વેચવાલી નિકળતા બેન્ચમાર્ક ઈન્ડેક્સ નીચે ગબડ્યા હતા. આ ઉપરાંત નરમ વૈશ્વિક પ્રવાહ પણ સ્થાનિક બજારમાં ઘટાડા માટે જવાબદાર પરિબળ હતું. એશિયાના બજારોમાં પણ નરમાઈની ચાલ જોવા મળી હતી. મધ્યસત્રમાં યુરોપના બજારો સાધારણ ઉછાળા સાથે કામ કરી રહ્યા હતા. ડોલર સામે રૂપિયો ચાર પૈસા નરમ પડીને 74.23ની સપાટીએ બંધ થયો હતો.