રોમ - 

પગની ઈજાને કારણે સેરેના વિલિયમ્સને ફ્રેન્ચ ઓપનના ચોથા દિવસે જ ટૂર્નામેન્ટમાંથી નીકળી જવું પડ્યું છે. અમેરિકાની સેરેના બીજા રાઉન્ડમાં બુલ્ગારિયાની સ્વેતાના પિરોનકોવા સામે રમવાની હતી.

સેરેનાએ કહ્યું કે, ‘મને લાગે છે કે, મારે ચારથી છ સપ્તાહ સુધી આરામ કરવાની જરૂર છે. ચાલવામાં મુશ્કેલી પડી રહી છે.’ સેરેનાના નિકળવાથી 33 વર્ષની બિનક્રમાંકિત પિરોનકોવા કારકિર્દીમાં ત્રીજી વખત ફ્રેન્ચ ઓપનના ત્રીજા રાઉન્ડમાં પહોંચી છે.

પૂર્વ વર્લ્ડ નંબર-1 વિક્ટોરિયા અઝારેન્કા ઉલટફેરનો શિકાર થઈ છે. બીજા રાઉન્ડમાં તે સ્લોવાકિયાની એના કેરોલિના સામે 6-2, 6-2થી હારી ગઈ. મહિલા સિંગલ્સમાં ત્રીજી સીડ એલિના સ્વિટોલિનાએ મેક્સિકોની રેનાટા જારાજુઆને 6-3, 0-6, 6-2થી, કિકી બર્ટેન્સે સારા ઈરાનીને 7-6, 3-6, 9-7 અને આર્યના સબાલેન્કાએ જેસિકા પેગુલાને 6-3, 6-1થી હરાવી.