જામનગર-આજના સોશ્યલ મીડીયાના યુગમાં યુવતીઓ સરળતાથી પ્રેમીઓ પર આંધળો વિશ્વાસ મુકીને ફોટાઓ અને વિડીયો આપી દે છે. ત્યારે મુકેલા યુવકો વિશ્વાસનો ગેરલાભ ઉઠાવી લે છે. આવો જ કિસ્સો જામનગર જીલ્લાના ધ્રોલમાં સામે આવ્યો છે. પ્રેમી સાથે સંબંધ તોડી નાંખતી યુવતીના બિભત્સ ફોટાઓ સોશ્યલ મીડીયામાં વાયરલ કરી દેતાં પોલીસમાં ફરિયાદ નોંધાઈ છે. ધ્રોલમાં રહેતી એક યુવતીને અગાઉ ધ્રોલના જ એક યુવક સાથે પ્રેમ સંબંધ હતો. તે સમયે પ્રેમીએ વિશ્વાસમાં લઈને અશ્લીલ ફોટાઓ અને વિડીયો કોલ રેકોર્ડ કરીને યુવકે તેના મોબાઈલમાં સંગ્રહ કરીને રાખ્યા હતાં. જે બાદ યુવતીએ યુવક સાથે પ્રેમ સંબંધ તોડી નાંખતાં પ્રેમીએ પોતાના મોબાઈલ એપ્લીકેશન દ્વારા બિભત્સ ફોટાઓ અને વિડીયો સોશ્યલ મીડીયામાં વાયરલ કરી દીધા હતાં. મોબાઈલ એપ્લીકેશન મારફતે ખરાબ તેમજ ધમકી ભર્યા મેસેજ તેમજ કોલ કરીને જાનથી મારી નાંખવાની ધમકી આપતો હોવાની યુવતીએ ગઈકાલે ધ્રોલ પોલીસ સ્ટેશનમાં ફરિયાદ નોંધાવી હતી. જેથી પોલીસે આરોપી હેમત ગેલજીભાઈ ઉર્ફે ઘેલાભાઈ ચાવડા સામે ધી ઈન્ફર્મેશન ટેકનોલોજી એકટ સહિતની કલમ હેઠળ ગુનો નોંધ્યો છે. 

વડોદરા- વડોદરા ક્રાઈમબ્રાંચે યુટ્યુબર શુભમ મિશ્રાની ધરપકડ કરી છે. વડોદરા ક્રાઇમ બ્રાન્ચે સુઓમોટો ફરિયાદ દાખલ કરી ધરપકડ કરી છે. મુંબઈની મહિલા કોમેડિયન અગરીમા જોશુઆને ગંદી ગાળો બોલી ટ્વીટર પર ધમકી આપતી પોસ્ટ શુભમ મિશ્રાએ કરી હતી. મહિલા કોમેડિયને શિવાજી મહારાજ પર જોક કરતા શુભમ મિશ્રા રોષે ભરાયો હતો. શુભમ મિશ્રા સામે કાર્યવાહી કરવા રાષ્ટ્રીય મહિલા આયોગના ચેરમેને ગુજરાતના ડીજીપીને ટ્વીટ કરી આદેશ કર્યો હતો. અભિનેત્રી સ્વરા ભાસ્કરે પણ મહારાષ્ટ્ર સરકાર અને પોલીસને કાર્યવાહી કરવા માગણી કરી હતી. શુભમ મિશ્રાના ઈન્સ્ટાગ્રામ અને યુટ્યુબ હજારો ફોલોઅર્સ છે. પોલીસે સોશિયલ મીડિયા ઉપર પણ જાણકારી આપી કે શુભમ વિરુદ્ધ કાયદાકીય કાર્યવાહી કરવામાં આવશે. પોલીસે કહ્યું કે આઈપીસી અને આઈટી એક્ટની યોગ્ય કલમો હેઠળ એફઆઈઆર નોંધવામાં આવશે.મળતી માહીતી મુજબ અનુસાર સોશ્યલ મિડિયા પર અભિનેત્રી સ્વરા ભાસ્કરના ટ્વીટર એકાઉન્ટ પર એક વિડિયો અપલોડ થયેલો હતો. જેમાં શુભમ મિશ્રાએ કોમેડિયન અગ્રીમા જોશુઆને બિભત્સ ગાળો ધાક-ધમકી આપતો અને મહિલાની ગરીમાને હાની પહોચે એવુ બોલતો હોવાનું જણાઇ આવ્યુ હતુ. અભિનેત્રી સ્વરા ભાસ્કરે આ આરોપીને પકડવા માટે મહારાષ્ટ્ર પોલીસ તથા સરકારને ટ્વીટર પર ટ્વીટ પણ કર્યુ હતુ. શુભમ મિશ્રા વડોદરા સ્થિત હોવાની વિગતો પોલીસને મળી આવતાં પોલીસે તાત્કાલીક વડોદરાના અટલાદરા વિસ્તારમાં નારાયણ વાડી પસે દિપ દર્શન સોસાયટીમાં રહેતા શુભમ રમેશભાઇ મિશ્રાની સામે કાયદેસરની કાર્યવાહી શરૂ કરી દીધી હતી.સાયબર ક્રાઇમના પીએસઆઇ કે.સી. રાઠોડ તથા પી.એમ. રાખોલીયા તથા સાયબરની ટીમે આ મામલે શુભમની સામે ફરીયાદ દાખલ કરીને તેની તાત્કાલીક ધરપકડ કરી હતી. શુભમ મિશ્રાના યુટ્યુબ પર અસંખ્યા ફોલોઅર છે. સોશ્યલ મિડિયામાં ખાસ કરીને ઇન્સ્ટાગ્રામ અને ટીકટોક પર તે છવાયેલો હોય છે. અત્રે ઉલ્લેખનીય છે કે, અગ્રીમા જોશુઆએ ૨૦૧૯માં સ્ટેન્ડ અપ કોમેડીના એક પર્ફોર્મન્સમાં અરબી સમુદ્રમાં છત્રપતિ શિવાજી મહારાજના સ્મારક વિશે ટિપ્પણી કરી હતી. એ વિડિયો ટ્વિટર અને ફેસબુક જેવા સોશ્યલ મીડિયા પર વહેતો થયો હતો. ત્યારપછી કેટલાક લોકોએ એ ટિપ્પણી દ્વારા શિવાજી મહારાજનું અપમાન થયું હોવાના આક્ષેપ પણ કર્યા હતા. જેનો પણ ભારે વિવાદ ઉઠ્યો હતો.

વડોદરા, તા.૧૨ શહેરના ફતેગંજ પોલીસ મથકના ચકચારી કસ્ટોડિયલ ડેથ પ્રકરણમાં પોલીસને અત્યંત મહત્ત્વના પુરાવાઓ હાથ લાગ્યા છે. ગમે તેવા ચાલક ગુનેગારો પણ એક પુરાવો છોડી દેતાં હોય છે એ પુરાવો પોલીસને હાથ લાગી ગયો છે. જ્યારે એફઆઈઆરને સમર્થન આપતાં નિવેદનો માટે પણ બે જવાનો તૈયાર થયા છે જેના કારણે મૃતદેહ મળ્યા વગર પણ ગુનો સાબિત કરી શકાશે એમ તપાસ અધિકારીઓ માની રહ્યા છે. બીજી તરફ શેખ બાબુના મૃતદેહને સગેવગે કરવા માટે એક નહીં પણ બે કાર વપરાઈ હોવાનું બહાર આવ્યું છે. જ્યારે મૃતદેહને સળગાવી દેવાયો હોવાની જાણકારી હાથ લાગતાં પોલીસે પુરાવાઓ ભેગા કરવાનું શરૂ કર્યું છે. ગત તા.૧૦મી ડિસેમ્બરે ચોરીના આરોપ હેઠળ ફતેગંજ પોલીસ મથકે લેવાયેલા શેખ બાબુની હત્યા કરી દેવાઈ હોવાની વિગતો એસીપીની તપાસમાં બહાર આવ્યા બાદ પીઆઈ, પીએસઆઈ અને ચાર પોલીસ કોન્સ્ટેબલો વિરુદ્ધ ગુનો નોંધાયો હતો એ પહેલાંથી છ આરોપીઓ ભાગી છૂટયા હતા. એમને ઝડપી પાડવા માટે પોલીસની જુદી જુદી ટીમો અલગ અલગ દિશાઓમાં તપાસ કરી રહી છે. ત્યારે શેખ બાબુની હત્યા કેસમાં પોલીસને મજબૂત પુરાવાઓ હાથ લાગ્યા છે. તપાસ અધિકારી સમક્ષ ઉપસ્થિત થયેલા બે જવાનો પૈકી ‘એમ’ નામ ધારીએ ૧૦ મી ડિસેમ્બરની રાતની ઘટના અંગે વર્ણવેલી વિગતોથી ખુદ તપાસ અધિકારી ચોંકી ઊઠયા હતા અને પોલીસની સામેનો કેસ હોવાથી અદાલતમાં પાછળથી હોસ્ટાઈલના થઈ જાય એ માટે ૧૬૪ મુજબનું નિવેદન આપવા જણાવતાં ‘એમ’ નામના ઈસમે તૈયારી દર્શાવી છે અને સોમવારે આ અંગેનું નિવેદન પણ નોંધાઈ જશે એમ સૂત્રોએ જણાવ્યું છે. બીજી તરફ ગુનો નોંધાયા બાદ ફતેગંજ પોલીસ મથકમાં એ સમયે કામ કરતા એક ‘વી’ નામધારી જવાને પણ ભવિષ્યમાં એની પણ સંડોવણી બહાર આવી શકે એમ હોવાથી તપાસ અધિકારીઓ સમક્ષ ઉપસ્થિત થઈ આખી ઘટના અંગે એની પાસે રહેલી જાણકારી આપી ૧૬૪ મુજબ નિવેદન નોંધવા માટેની તૈયારી પણ દર્શાવી છે. ‘એમ’ અને ‘વી’ એમ બે જવાનોના સોમવારે નિવેદન માટે અદાલત પહોંચશે, જ્યાં બંધબારણે નિવેદન લેવાશે અને બંધ કવરમાં મુકી ટ્રાયલના દિવસે જ ખોલવામાં આવશે. આમ અત્યાર સુધીની પોલીસની તપાસમાં આ બેના નિવેદનો શેખ બાબુની હત્યા પુરવાર કરી જ શકે એવા હોવાનું પોલીસસૂત્રોએ વિશ્વાસપૂર્વક જણાવ્યું છે. અત્યાર સુધી મૃતદેહ વગર આ કેસ કોર્ટમાં નબળો પડી જશે એમ માનવમાં આવતું હતું,  પરંતુ આ બેના નિવેદનોથી કેસ વધુ મજબૂત થશે એવું જાણકારોનું માનવું છે અને આ અંગેના પૂરતા અભ્યાસ દરમિયાન ૧૩૦ જેટલા આવા બનાવોની ઝીણવટપૂર્વક અવલોકન કરાયા બાદ આ પીઆઈ, પીએસઆઈ અને ચાર પોલીસ કોન્સ્ટેબલો ઉપર સાપરાધ માનવવધનો ગુનો નોંધાયો હતો. બીજી તરફ શેખ બાબુના મૃતદેહને સગેવગે કરવા એક નહીં, બે કાર વપરાઈ હોવાનું પોલીસના ધ્યાન ઉપર આવ્યું છે. મૃતદેહ સળગાવવા માટે લાકડાં શહેરમાંથી લઈ જવાયાં? શહેરની આસપાસના વિસ્તારોમાં જ શેખ બાબુના મૃતદેહને સળગાવી દેવાયો હોવાનું પોલીસ માની રહી હતી ત્યારે મૃતદેહને સળગાવવા માટે મોટા પ્રમાણમાં લાકડાંની જરૂર પડે એવા સંજાેગોમાં ફતેગંજ કે છાણી વિસ્તારમાં આવેલા લાકડાંના પીઠા કે લાકડાંની વખાર ઉપરથી એ ખરીદાયા હોઈ શકે એવી આશંકા વ્યક્ત કરી આજે પોલીસની જુદી જુદી ટીમોએ નિઝામપુરાથી માંડી ફતેગંજ, નવા યાર્ડ અને છાણી રોડ ઉપર તપાસ હાથ ધરી હોવાનું સૂત્રોએ જણાવ્યું હતું. મૃતદેહ સગેવગે કરવા માટે બે કારનો ઉપયોગ થયાનું બહાર આવ્યું શેખ બાબુના હત્યાકાંડની તપાસ કરી રહેલી પોલીસને મૃતદેહ સળગાવી દેવાયો હોવાના પુરાવાઓ હાથ લાગ્યા છે અને મૃતદેહને સગેવગે કરવા માટે એક નહીં પણ બે કાર વપરાઈ હોવાનું શોધી કાઢયું છે. કારણ કે, સળગાવવા માટે મોટા પ્રમાણમાં લાકડાંની જરૂર પડયે ત્યારે મૃતદેહ અને લાકડાં એક કારમાં લઈ જવા શક્ય નહીં હોવાથી હાથ ધરેલી તપાસમાં એલઆરડી જવાનો પૈકી એકના સાળાની કાર બીજી વાહન તરીકે વપરાઈ હોવાનું બહાર આવ્યું છે. આમ પોલીસ શેખ બાબુ હત્યાકાંડમાં ધીમી પણ મક્કમ ગતિએ આગળ વધી રહી છે. 

વડોદરા, તા. ૧૨ મુંબઈની એક મહિલા સ્ટેન્ડ અપ કોમેડિયને ગયા વર્ષે મુંબઈમાં બનવામાં આવનાર છત્રપતિ શિવાજી મહારાજના સ્ટેચ્યુ અંગે કરેલ વિવાદાસ્પદ ટિપ્પણીને લઈને વડોદરાના એક બહુચર્ચિત યુટ્યૂબરે પોતાના વીડિયોમાં બીભત્સ ગાળો દઈને બળાત્કારની ધમકી આપતા નેશનલ કમિશન ફોર વુમન દ્વારા તેની સામે કાર્યવાહી કરવા માટે ગુજરાત પોલીસને જાણ કરવામાં આવી હતી. જેના પગલે ગુજરાત પોલીસ દ્વારા વડોદરા પોલીસને તેની સામે કાર્યવાહી કરવા માટે સૂચના આપવામાં આવી છે. મુંબઈની મહિલા સ્ટેન્ડ અપ કોમેડિયન અગ્રિમા જોશુઆ એ વર્ષ ૨૦૧૯માં પોતાના લાઈવ શો માં મુંબઈમાં બનાવવામાં આવનાર છત્રપતિ શિવાજી મહારાજની પ્રતિમા અંગે જોક કર્યો હતો. આ જોક અંગે નો વિડીયો તાજેતરમાં વાઇરલ થતા સોશિયલ મીડિયા પર શિવાજી મહારાજના સમર્થકોએ અગ્રિમા જોશુઆને ટ્રોલ કરવાની શરુ કરી દીધી હતી. પોતાની ભૂલ સમજાતા અગ્રિમાએ જાહેરમાં માફી માંગીને વિડીયો પણ ડીલીટ કરી નાખ્યો હતો. જોકે, ખુદ ને શિવાજી મહારાજનો ચાહક માનનાર વડોદરાના યુટ્યુબર શુભમ મિશ્રાએ તાજેતરમાં જ એક વિડીયો જાહેર કર્યો હતો. જેમાં અગ્રિમા જોશુઆને સાંભળી પણ ન શકાય તે પ્રકારની બીભત્સ ગાળો દઈને બળાત્કાર કરવાની ધમકી આપી હતી. તેટલું જ નહિ, પરંતુ પોતાના ફોલોવર્સને પણ આમ કરવા માટે પ્રેરિત કર્યા હતા. શુભમ મિશ્રાનો આ પ્રકારનો વિડીયો નેશનલ કમિશન ફોર વુમનના ધ્યાને આવતા તેઓએ ગુજરાતના પોલીસ વડાને તેના વિરુદ્‌ધ કાર્યવાહી કરવા માટે અનુરોધ કર્યો હતો. જેના અનુસંધાને શુભમ મિશ્રા સામે કાયદેસરની કાર્યવાહી કરવા માટે ગુજરાત પોલીસ તરફથી વડોદરા પોલીસને સૂચના આપવામાં આવી હતી. કોમેડિયન, એક્ટરે નેશનલ કમિશન ઓફ વુમનને ફરિયાદ કરી હતી શુભમ મિશ્રાએ પોતાના એકાઉન્ટ પર અગ્રિમા જોશુઆને ધમકીઓ આપતો વિડીયો જાહેર કરતા સ્ટેન્ડઅપ કોમેડિયન કુનાલ કામરાએ નેશનલ કમિશન ફોર વુમનને ટવિટ કરીને તેની સામે પગલાં લેવા રજૂઆત કરી હતી. જેની ગણતરીની મિનિટોમાં અભિનેત્રી સ્વરા ભાસ્કરે મુંબઈ પોલીસ, આદિત્ય ઠાકરે, મહારાષ્ટ્રના ગૃહમંત્રી અનિલ દેશમુખ સહિતના ઉચ્ચ હોદ્દેદારોને ટવિટ કરીને શુભમ મિશ્રા વિરુદ્‌ધ ફરિયાદ કરવા માટે રજૂઆત કરી હતી. આ ટવિટને કારણે જ નેશનલ કમિશન ફોર વુમન દ્વારા ગુજરાતના પોલીસ વડાને પગલાં લેવા અનુરોધ કરવામાં આવ્યો હોવાનું જાણવા મળ્યું છે. મહારાષ્ટ્રના ગૃહમંત્રીની કોમેડિયન વિરુદ્ધ કાર્યવાહીની સૂચના સ્ટેન્ડઅપ કોમેડિયન અગ્રિમા જોશુઆએ એપ્રિલ, ૨૦૧૯માં મુંબઈના ખારના કેફેમાં મુંબઈમાં બનાવવામાં આવનાર શિવાજી મહારાજના સ્ટેચ્યુ અંગે ટિપ્પણી કરી હતી. જેનો વિડીયો વાઇરલ થતા શિવાજી મહારાજના સમર્થકોમાં રોષ ની લાગણી વ્યાપી ગઈ હતી અને જે જગ્યાએ આ પરફોર્મન્સ થયું હતું, તે જગ્યાની પણ તોડફોડ કરી હતી. ક્રોધ વધતો જતા મહારાષ્ટ્રના ગૃહમંત્રી અનિલ દેશમુખે મુંબઈના પોલીસ કમિશ્નર તેમજ સાયબર સેલને મહિલા કોમેડિયન વિરુદ્ધ કાર્યવાહીની સૂચના આપી હતી. આ સાથે ક્રોધે ભારાયેલા લોકોને કાયદો અને વ્યવસ્થા જાળવવા માટે અપીલ કરી હતી. રાત્રે પોલીસે આરોપીની અટકાયત કરી વિડીયોમાં જેમ ફાવે તેમ ગાળો દેનાર શુભમ મિશ્રા પોલીસ કાર્યવાહીના ડરથી સવારથી જ ગાયબ થઇ ગયો હતો. જોકે, રાજ્યના ઉચ્ચ પોલીસ અધિકારીઓની સૂચનાને આધારે વડોદરા પોલીસે મોડીસાંજે શુભમ મિશ્રાની અટકાયત કરી હતી અને આઈ.પી.સી તેમજ આઈ.ટી એક્ટની કલમો અંતર્ગત તેની સામે કાર્યવાહી શરુ કરી હતી. આ ઉપરાંત પોલીસ દ્વારા તેનું અને તેના માતાપિતાના નિવેદનો પણ લેવામાં આવ્યા હતા. નેશનાલિઝમના નામે બીભત્સ કન્ટેન્ટ, ૩ લાખથી વધુ ફોલોઅર્સ વડોદરાનો શુભમ મિશ્રા છેલ્લા ઘણા સમયથી સોશિયલ મીડિયા પર પ્રખ્યાત થયો છે.ઇન્સ્ટાગ્રામ પર તેના ૩૫ હજારથી વધુ ફોલોઅર્સ છે. જ્યારે તેની યુટ્યુબ ચેનલના ૨,૯૮,૦૦૦ સબસ્ક્રાઈબર છે. શુભમ પોતાના વીડિયોમાં નેશનલિઝમના નામે ગાળાગાળીથી ભરપૂર તેમજ બીભત્સ કન્ટેન્ટ પૂરો પાડીને વિકૃત આનંદ લે છે અને આ જ પ્રકારે સોશિયલ મીડિયા પર કહેવાતા ‘એન્ટી નેશનલ’ લોકો વિરુદ્‌ધ અભદ્ર ભાષાનો પ્રયોગ કરીને મજા લેનાર ‘હિન્દુસ્તાની ભાઉ’ને પોતાનો આદર્શ માને છે.