દે.બારીયા, તા.૩૦ પ્રાથમિક શિક્ષકોની મુખ્ય માંગણીઓની વાત કરીએ તો ૪૨૦૦ ગ્રેડ પે, સીસીસી પાસને મૂળ તારીખથી ઉચ્ચત્તર પગાર ધોરણ મળે તેમજ મુખ્ય શિક્ષકને થતા અન્યાય સામે દાહોદ જિલ્લાના પ્રાથમિક શિક્ષકોએ વિવિધ સોશીયલ મીડિયા મારફતે આંદોલનનું રણશીંગુ ફૂક્યું છે. પ્રાથમિક શિક્ષકો પડતર પ્રશ્નો મુદ્દે પ્લે કાર્ડ, બેનર સાથે સોશીયલ મીડિયામાં ફોટો શેર કરીને સરકાર સામે અનોખો વિરોધ નોંધાવી રહ્યાં છે. આ બાબતે જિલ્લા પ્રાથમિક શૈક્ષિક મહાસંઘના મહામંત્રી નિતેશભાઈ પટેલે જણાવ્યું હતું કે ૨૦૧૦ પહેલાના પ્રાથમિક શિક્ષકોને મળતું પ્રથમ ઉચ્ચત્તર પગાર ધોરણ ૪૨૦૦ ગ્રેડ પે શિક્ષણ વિભાગના ૩૧.૧.૧૯ ના પરિપત્ર અન્વયે સ્થગિત કરવામાં આવ્યું છે. જેથી દર મહિને શિક્ષકોને દસ હજાર રૂપિયા સુધીનું આર્થિક નુકસાન થઈ રહ્યું છે જે ખૂબ જ અન્યાયકારી છે. જેને લઇને સમગ્ર રાજ્ય સહિત દાહોદ જિલ્લાના શિક્ષકોમાં પણ આક્રોશ જોવા મળી રહ્યો છે. આ ઉપરાંત સીસીસી પાસ કરનારને મૂળ તારીખથી ઉચ્ચત્તર પગાર ધોરણનો લાભ આપવો જોઈએ. પ્રાથમિક શૈક્ષિક સંઘના અધ્યક્ષ બળવંતસિંહ ડાંગરે ઉમેર્યું હતું કે મુખ્ય શિક્ષક ની કેડર માટે વધ ઘટ, વિદ્યાર્થી રેશિયો, ઇજાફો, ઉચ્ચત્તર પગાર ધોરણ તેમજ આર.આર.ના પ્રશ્નો લાંબા સમયથી પડતર અથવા અસ્પષ્ટ છે. જેની સામે મુખ્ય શિક્ષકો પણ ખાસ્સી નારાજગી છે. રાજ્ય સંગઠનના હોદ્દેદારો અને સરકાર સાથેની બેઠકમાં યોગ્ય ઉકેલ ના આવતા હાલની પરિસ્થિતિએ સોશીયલ મીડિયામાં તા.૨૫ જૂનથી શરૂ થયેલા ઓનલાઇન આંદોલનમાં દાહોદ જિલ્લાના તમામ તાલુકાઓમાંથી મોટી સંખ્યામાં શિક્ષકો અને મુખ્ય શિક્ષકો પોતાની માંગણીઓ સાથેનો ફોટો શેર કરીને વિરોધ દર્શાવી રહ્યાં છે.
દાહોદ, તા. ૩૦ મુખ્યમંત્રી વિજયભાઇ રૂપાણીએ આજે દાહોદ સહિત ચાર જિલ્લામાં કૃષિ વૈવિધ્યકરણ યોજનાનું ઇ-લોન્ચીંગ વિડિયો કોન્ફરન્સના માધ્યમથી કર્યું હતું. આ યોજના અંતર્ગત દાહોદ જિલ્લાના ૧૯૫૦૦ વનબંધુ ખેડૂત લાભાર્થીઓને રૂ. ૬.૮૨ કરોડના ખાતર બિયારણની સહાય રાજય સરકાર કરશે. આ ઇ-લોન્ચીંગ કાર્યક્રમમાં સાંસદ જસવંતસિંહ ભાભોરે દાહોદ જિલ્લાના ઉપસ્થિત આદિવાસી ખેડૂતોને આ સહાય-કીટનું વિતરણ કર્યું હતું.
આ પ્રસંગે સાંસદ જસવંતસિંહ ભાભોરે જણાવ્યું કે, રાજય સરકાર આદિવાસી ખેડૂતોના વિકાસ માટે કટિબદ્ધ છે. જિલ્લાના દરેકે દરેક ખેડૂતની આવક બમણી થાય એ માટે સહિયારા પ્રયાસથી આગળ વધવાનું છે. વડાપ્રધાન નરેન્દ્રભાઇ મોદીએ ખેડૂતોની આવક બમણી થાય એ માટે જે સ્વપ્ન સેવેલ છે તેને આપણે ચરીતાર્થ કરવાનું છે. આ માટે ખેડૂતો કૃષિ વૈવિધ્ય સાથે આધુનિક ટેકનોલોજીનો ઉપયોગ કરે તે ખૂબ જરૂરી છે. તેમણે જણાવ્યું કે, આ યોજનાથી જિલ્લાના ૧૯૫૦૦ ખેડૂત લાભાર્થીઓને રૂ. ૬.૮૨ કરોડના ખાતર બિયારણ સહાયનો લાભ મળશે. જે અંતર્ગત દરેક લાભાર્થી ખેડૂતને ૪૫ કિલો યુરીયા, એન.પી.કે. ૫૦ કિલો, એમોનિયા સલ્ફેટ ૫૦ કિલો, મકાઇ બિયારણ ૮ કિલો આપવામાં આવશે, જેની કિંમત રૂ. ૩૫૯૮ થાય છે. જેની સામે લાભાર્થીને રૂ. ૫૦૦ નો ફાળો આપવાનો રહે છે. આ ઉચ્ચ ગુણવત્તાવાળા ખાતર બિયારણથી ખેડૂત મબલક પાક મેળવશે અને તેમની આવકમાં નોંધપાત્ર વધારો થશે.
સાંસદ ભાભોરે ખેડૂતોને સમયસર બિયારણ મળી જાય એ માટે યોજના સાથે જોડાયેલા અધિકારીઓને જરૂરી સૂચના અને માર્ગદર્શન આપ્યા હતા. સાથે કોરોના સંક્રમણના સમયમાં સામાજિક અંતર અને માસ્ક વગેરે નિયમોનું પણ ચુસ્ત પાલન થાય તેનું ધ્યાન રાખવા જણાવ્યું હતું.
ગોધરા,તા.૨૬ ગુજરાત પ્રદુષણ નિયંત્રણ બોર્ડમાં પોતાની ફરજ દરમ્યાન પ્રદુષણો અટકાવવાના બદલે પ્રદુષણોના ખૂલ્લેઆમ સોદાઓ કરવાના ઉઘરાણાઓમાં માહેર એવા કલાસવન લાંચિયા અધિકારી ગીરીજાશંકર મોહનભાઇ સાધુ સામે ગોધરા સ્થત એ.સી.બી.કચેરીમાં ૬૮ લાખ રૂપિયાની અપ્રમાણસર મિલકતો સંદર્ભમાં ગુનો દાખલ કરવામાં આવતા જી.પી.સી.બી.ને ભ્રષ્ટ્રાચારનો અખાડો બનાવનારા લાંચિયા અધિકારીઓમાં જબરદસ્ત ભય પ્રસરી જવા પામ્યો છે.
ગોધરા ખાતે ગુજરાત પ્રદુષણ નિયંત્રણ બોર્ડમાં પ્રાદેશીક અધિકારી તરીકે પોતાની ફરજાના સત્તાકાળ દરમીયાન ગીરજાશંકર સાધુએ પ્રદુષણને નિયંત્રણમાં રાખવાના બદલે પ્રદુષણ ફેલાવવાના ખૂલ્લેઆમ ભ્રષ્ટ્રાચારના સોદાઓ કરવાના વહીવટમાં તેઓ હંમેશા બહુચર્ચીત બન્યા હતા. શુક્રવારે એ.સી.બી.શાખાએ આ લાંચીયા અધિકારી સામે વધુ એક અપ્રમાણસર મિલકતનો ગુનો નોંધીને કાયદાના સકંજાને મજબુત બનાવ્યો છે. અત્યારે ગાંધીનગર ખાતે જી.પી.સી.બી.માં પર્યાવરણ ઇજનેર વર્ગ-૧ ના હોદ્દા સાથે ફરજ બજાવતા ગીરજાશંકર સાધુ જયારે પંચમહાલ જિલ્લામાં પ્રાદેશીક અધિકારી તરીકે ફરજ બજાવતા હતા.
ત્યારે ડી.મીનરલાઇઝ વોટર પ્લાન્ટ શરૂ કરવા માંગતા એક સંચાલક પાસેથી એન.ઓ.સી.આપવા માટે ૬૦ હજાર રૂપિયા અને દર ત્રણ મહીને વિઝીટી દરમ્યાન હેરાન ગતી નહીં કરવા માટે ૪૦ હજાર એમ ૧.૨૦ લાખ રૂપિયાના લાંચના છટકામાં ગોધરા એ.સી.બી.શાખાએ ગીરજાશંકર સાધુને છટકામાં ઝડપી પાડીને ગુનો દાખલ કરતા જી.પી.સી.બી.માં ભારે ચકચાર પ્રસરી જવા
પામી હતી.
જી.પી.સી.બી.ના કલાસવન અધિકારી ગીરજાશંકર સાધુ સામે પોતાની ફરજ દરમ્યાન પગાર ભથ્થાની આવક સામે તેઓએ વસાવેલ મિલકતો સંદર્ભમાં વડોદરા એ.સી.બી.ઝોનના ઇન્ચાર્જ મદદનીશ નિયામક કે.વાય.વ્યાસે હાથ ધરેલ ઝીણવટપૂર્વકની તપાસના ૧-૪-૨૦૧૧ થી ૩૧-૩-૨૦૧૭ સુધીના એક પિરીયડની હાથ ધરેલ તપાસમાં જી.પી.સી.બી.ના આ લાંચિયા અધિકારી ગીરજાશંકર સાધુએ આવકની સામે ૬૮,૨૪,૩૫૭ રૂ.ની બેનામી સંપત્તિઓ વસાવી હોવાના સંદર્ભમાં ગોધરા એ.સી.બી.એ ભ્રષ્ટ્રાચાર નિવારણ અધિનીયમની કલમો હેઠળ ગુનો દાખલ કરીને આ ગુનાની તપાસ એ.સી.બી.પી.આઇ.આર.આર.દેસાઇને સુપ્રત કરી છે.
દાહોદ, તા. ૨૩ દાહોદ જિલ્લામાં તા. ૨૩ જુનને સવારે ૧૧ વાગ્યા સુધીમાં કોરોના સંક્રમણ બાબતની સ્થિતી જોઇએ તો હાલમાં જિલ્લામાં કોવીડ સંક્રમણના ૪ કેસો સક્રિય છે જયારે અત્યાર સુધીમાં કુલ ૪૬ પોઝિટિવ કેસ નોંધાયા છે. જેમાંથી ૪૨ દર્દીઓને સંપૂર્ણ સ્વસ્થ થતા રજા આપવામાં આવી છે. અત્યાર સુધીમાં જિલ્લામાં કોરોના સંક્રમણ બાબતે કુલ ૫૮૦૩ સેમ્પલ લેવામાં આવ્યા છે. જેમાંથી ૫૬૧૨ સેમ્પલનો રીપોર્ટ નેગેટીવ આવ્યો છે. જયારે ૧૪૫ કેસોના રીપોર્ટ પેન્ડીગ છે. જિલ્લામાં ૧૮ નાગરિકોને સરકારી કવોરન્ટાઇન અને ૫૪૯ નાગરિકોને હોમ કવોરન્ટાઇન કરવામાં આવ્યા છે.
