અરવલ્લી-સરદાર સાહેબના જીવનમાંથી પ્રેરણા લઈ સરદારધામ સમાજ નિર્માણથી રાષ્ટ્ર નિર્માણના ધ્યેયને ચરિતાર્થ કરવા મિશન-૨૦૨૬ અંતર્ગત તેના મિશન, વિઝન અને પાંચ લક્ષ્યબિંદુઓ સિદ્ધ કરવા કટિબદ્ધ અને સંકલ્પબદ્ધ છે. “સરદારધામ આઈકોનિક બિલ્ડિંગ"નું નિર્માણ ભાવિ પેઢીના ઉજ્જવળ ભવિષ્યનો આધાર બની રહેશે. સમાજના ઈતિહાસમાં સૌ પ્રથમ વખત ૨૦૦ કરોડના સરદારધામ ભવનનું ઈ-લોકાર્પણ એવમ્ ૨૦૦ કરોડના કન્યા છાત્રાલય સરદારધામ ફેઝ-૨નું ઈ-ભૂમિપૂજન ભારતના યશસ્વી-તેજસ્વી વડાપ્રધાન તથા ગુજરાતના પનોતા પુત્ર માનનીય નરેન્દ્ર મોદીના વરદ હસ્તે તારીખ ૧૧ સપ્ટેમ્બરના રોજ યોજવામાં હોઈ સરદારધામ ના પ્રમુખ ગગજીભાઈ સુતરિયા દ્વારા મીડિયા સમિતિને આમંત્રણ આપવામાં આવ્યું છે. સવારે વર્ચ્યુઅલ લોકાર્પણ બાદ ૧૨.૦૦ થી ૧.૩૦ દરમ્યાન ભોજન સમારંભ યોજાશે. બપોરે ૩.૦૦ થી ૪.૦૦ વાગ્યે જીપીબીઓ યુવા તેજ તેજસ્વીની તેમજ નવીન નિમણૂક પામેલા અધિકારીઓ, કર્મચારીઓ અને મીડિયા કર્મીઓને સામુહિક સન્માનિત કરવામાં આવશે. સાંજે એક શામ અપનો કે નામ, ડાયરો અને રાસ ગરબા યોજાશે. સમગ્ર કાર્યક્રમ માં કોરોના ગાઈડ લાઈન મુજબ બેઠક વ્યવસ્થા કરવામાં આવી છે.
અરવલ્લી-ભાજપ પક્ષની પાંખ ગણાતા ભારતીય કિસાન સંઘે ખેડૂતો ના પ્રશ્નોને લઈને સરકાર સામે બાંયો ચડાવી છે. કૃષિકાયદાના મુદ્દે સમર્થન આપી કિસાનસંઘને સરકારના વહાલા થવું છે ને,ખેડૂતોના પ્રશ્ને સરકારનો કાન પણ આમળવો પડે તેવી સ્થીતીનું નિર્માણ થતા અરવલ્લી,સાબરકાંઠા સહીત સમગ્ર રાજ્યમાં કિસાનસંઘે પોષણક્ષમ ભાવ, સિંચાઈના પાણી સહીત અનેક પડતર પ્રશ્નોને પગલે ધરણા યોજ્યા હતા અરવલ્લી જીલ્લા આયોજીત ભારતીય કિસાન સંઘે કલેકટર કચેરીમાં ધરણા યોજી વડાપ્રધાનને સંબોધી કલેકટરને આવેદનપત્ર આપ્યું હતું અને ખેડૂતોની સમસ્યાનું નિરાકરણ નહીં આવે તો આગામી સમયમાં જલદ આંદોલનની ચીમકી કિસાનસંઘના અગ્રણીઓએ ઉચ્ચારી હતી.અરવલ્લી જીલ્લા કલેકટર કચેરી “કિસાન હીત કા કાજ કરેગા.....વોહી દેશ પે રાજ કરેગા” ના સૂત્રોથી પરીસર ગુંજી ઉઠ્યું હતું અરવલ્લી-સાબરકાંઠા જીલ્લા કલેકટર પરીસરમાં ખેડૂતોના પડતર માંગણીઓને લઈને કિસાનસંઘના અગ્રણીઓ,કાર્યકરો અને મહિલા પાંખના મોટી સંખ્યામાં કાર્યકરોએ ધરણા યોજ્યા હતા કિસાનસંઘના અગ્રણીઓના જણાવ્યા અનુસાર,દેશના ખેડૂતની દયનીય દશા બેઠી છે મોઘાદાટ ખાતર, જંતુનાશક દવા,બિયારણ ઉપરાંત ખેત મજૂરીનો ખર્ચ કર્યા બાદ જે ખેત ઉત્પાદન થાય તેના પોષણક્ષમ ભાવો જ મળતા નથી. બજારમાં ખેડૂતોએ પડતર કિંમત કરતાં ય ઓછા ભાવે અનાજ વેચવુ પડે છે. મગફળી,કપાસ,ડાંગર , કઠોળ, ઘઉં,શાકભાજી સહીત તમામ પાકોના પોષણક્ષમ ભાવ જ મળતા નથી જેથી ખેડૂતો આિર્થક રીતે ભાંગી પડયા છે. તેમજ જમીન રીસર્વેમાં થયેલી ભૂલો સુધારવી, ખેતીમાં જંગલી જાનવરોથી થતા ભેલાણમાં વળતર આપવું,વીજ ચેકીંગના નામે ચાર્જ ખોટા બીલો અને ફિક્સ ચાર્જ બંધ કરવામાં આવે, શાકભાજી તેમજ ખેત પેદાશના ટેકાના ભાવો ૧ કિલોથી નક્કી કરવામાં આવે,દૂધના પોષણક્ષમ ભાવ આપવામાં આવે પાણી પત્રક સમયસર કરવું સહીત અનેક પડતર મુદ્દે કિસાન સંઘે ખેડૂતોની હક્કની લડાઈ માટે આવેદનપત્ર આપ્યું હતું. અત્રે ઉલ્લેખનીય છે કે કૃષિ કાયદા મુદ્દે કિસાન સંઘ સરકારની સાથે છે પણ સિંચાઇના પાણી, પોષણક્ષમ ભાવો મુદ્દે કિસાનસંઘ સરકાર સામે બાથ ભિડવા મેદાને પડી છે.બીજીબાજુ કૃષી કાયદાના સમર્થક ખેડૂત સંગઠનોનું કહેવુ છેકે, કૃષિ કાયદા મુદ્દે ચૂપ થઇ કિસાનસંઘને સરકારના વ્હાલા ય થવુ છે અને પોષણક્ષમ ભાવ મુદ્દે સરકારને કાન આમળવો છે તે શક્ય નથી. માખણ ખાવુ છે પણ દોણી સંતાડીને. આમ, ભાજપની ભગીની સંસૃથા કિસાનસંઘ હવે ખેડૂતોને પોષણક્ષમ ભાવો મળે તે માટે લડત લડવા તૈયાર છે.
અરવલ્લી -એક મહિનાથી મેઘરાજાએ હાથતાળી આપી દીધા બાદ સાબરકાંઠા જિલ્લામાં મેઘરાજાએ પધરામણી કરતાં છેલ્લા ૪૮ કલાક દરમિયાન પોશીનામાં અઢી ઇંચ તલોદ અને પ્રાંતિજમાં બે ઇંચ, ઇડર અને વડાલીમાં એક ઇંચ તથા વિજયનગરમાં દોઢ ઇંચ અન્ય તાલુકાઓમાં ૧૨ મીમી જેટલો વરસાદ નોંધાયો હતો. જરૂરના સમયે જ વરસાદની એન્ટ્રી થતાં મૂરઝાતી મોલાતને જીવતદાન મળ્યું છે અને વાદળો છવાયેલા જોઈ ખેડૂતોમાં આશા બંધાણી છે. ગત વર્ષની સરખામણીએ જિલ્લામાં હજુ પણ ૬૧.૪૪ ટકા વરસાદની ઘટ પ્રવર્તી રહી છે.રવિવારે પોશીનામાં એક ઇંચ અને વિજયનગરમાં પોણો ઇંચ જેટલો વરસાદ વરસ્યા બાદ સોમવારે બપોરે તલોદમાં બે ઇંચ અને પ્રાંતિજમાં એક ઇંચ વરસાદ તૂટી પડયો હતો. મંગળવારે પોશીનામાં દોઢ ઇંચથી વધુ ઇડર, પ્રાંતિજ, વડાલીમાં અડધા ઇંચ થી વધુ વરસાદ નોંધાયો હતો. માલપુરમાં અને તાલુકામાં મોડી સાંજે ઉભરાણ અને બાયડના ગાબટ પંથકમાં મંગળવાર સાંજે પોણો કલાકમાં એક ઇંચ વરસાદ પડ્યો હતો. જેના લીધે પાકોને જીવતદાન મળ્યું હતું.
ગત વર્ષની સરખામણીએ સાબરકાંઠામાં ૬૧.૪૪ % વરસાદની ઘટગત વર્ષે ૩૧ ઓગસ્ટ સુધીમાં સાબરકાંઠા જિલ્લામાં ૯૭.૪૧ ટકા વરસાદ વરસી ચૂક્યો હતો તેની સરખામણીએ ચાલુ વર્ષે ૩૫.૯૭ ટકા જ વરસાદ નોંધાયો છે અને ૬૧.૪૪ ટકા વરસાદની ઘટ પ્રવર્તી રહી છે. ચાલુ સપ્તાહમાં પણ વરસાદની આગાહી બંગાળના ઉપસાગરમાં સિસ્ટમ બન્યા બાદ ચોમાસુ ફરી સક્રિય બન્યું છે. હવામાન વિભાગના વર્તારા મુજબ ચાલુ સપ્તાહમાં સામાન્યથી માંડી મધ્યમ વરસાદ વરસતો રહેશે જે ખેડૂતો માટે સારા સમાચાર છે.
