મોડાસા, અરવલ્લી એસઓજીએ મેઘરજના ઢેકવાથી મેડિકલ ડિગ્રી કે સર્ટિફિકેટ વગર લોકોના આરોગ્ય સાથે ચેડાં કરતાં મેઘરજના પાદર મહુડીના શખ્સને ઝડપી પાડ્યો હતો. એસઓજીએ રૂ.૫૦૯૬ની એલોપેથીક દવાઓનો જથ્થો અને મેડિકલ સાધનો કબજે લઈ ઝડપાયેલા આરોપી વિરુદ્ધ કાર્યવાહી હાથ ધરી હતી. એસઓજીનો સ્ટાફ તાલુકાના ઇસરી પંથકમાં પેટ્રોલિંગમાં હતો. તે દરમિયાન એસઓજીને માહિતી મળી હતી કે ઢેકવામાં ડિગ્રી વગર એલોપેથીક દવાઓથી અને ઇન્જેક્શન વગર સારવાર કરતો અને કોઈપણ જાતની મેડિકલ ડિગ્રી કે સર્ટિફિકેટ વગર એલોપેથીક દવાઓનો ઉપયોગ કરી લોકોના આરોગ્ય સાથે ચેડાં કરતો શંકરભાઈ દિનેશભાઈ મનાત ગેરકાયદે પ્રેક્ટિસ કરી રહ્યો હોવાની માહિતીના આધારે એસઓજીએ ડિગ્રી વગર પ્રેક્ટિસ કરી રહેલા શંકરભાઈ દિનેશભાઈ મનાત રહે. પાદર મહુડી તા. મેઘરજને ઝડપી પાડ્યો હતો. એસઓજીએ સ્થળ પરથી રૂ. ૫૦૯૬ની એલોપેથીક દવાઓનો જથ્થો અને મેડિકલ સાધનો સહિતનો મુદ્દામાલ કબજે લઈ આરોપી વિરુદ્ધ ગુજરાત રજિસ્ટર મેડિકલ પ્રેક્ટિસ એક્ટ હેઠળ ગુનો નોંધ્યો હતો.