સુરત, તામિલનાડુ મર્કન્ટાઇલ બેંકનાં મેનેજર પ્રભાકર કાલીઅપ્પા નાડાર દ્વારા નોંધાવેલી ફરિયાદ મુજબ, બોગસ પેઢીઓ ઉભી કરનારાઓ, તમિલનાડુ મર્કન્ટાઇલ બેંક, રીંગરોડ શાખા, સુરતનાં બેંક મેનેજર આર. સુંદર, ગેરેન્ટર અને વેલ્યુઅરે ભેગા મળી લોન કૌભાંડ આચર્યું હતું. લોનનાં રૂપિયા ધંધા માટે લીધા હોવાનું દર્શાવીને તેઓએ વાસ્તવમાં કોઈ ધંધો નહીં હોવા છતાં બોગસ પેઢીઓ ઉભી કરી હતી. આ બોગસ પેઢીઓનાં નામે લોન લઈ મોર્ગેજમાં મૂકેલી પ્રોપર્ટીની વેલ્યુ ઓછી હોવા છતાં ઊંચી કિંમતનાં ખોટા વેલ્યુ રીપોર્ટ બનાવી તેને સાચા તરીકે રજૂ કર્યા હતા. આ લોનનાં રૂપિયાનો ઉપયોગ પોતાના અંગત ખર્ચમાં કરીને બેંકને કુલ ૧૬,૩૮,૦૦,૦૦૦નું આર્થિક નુકસાન પહોંચાડ્યું હતું. આ કૌભાંડમાં અશોક કાળુભાઇ કાનપરીયાએ ‘મેરીલ એન્ટરપ્રાઇઝ‘ નામની બોગસ પેઢી ઉભી કરી બેંક ખાતુ ખોલાવી, તમિલનાડુ બેંકમાં પેઢીનાં ધંધાની જગ્યા ખોટી દર્શાવીને ૧ કરોડની કેશ ક્રેડિટ લોન લીધી હતી. યાર્ન ટ્રેડિંગનો ધંધો ન કરતા હોવા છતાં બોગસ જગ્યા અને બોગસ સ્ટોક સ્ટેટમેન્ટ બનાવી રજૂ કર્યા હતા. આ ઉપરાંત, લોન માટે બેંકમાં મોર્ગેજ મૂકેલી મિલકતોનું ઓવર વેલ્યુએશન કરાવ્યું હતું. અશોક કાનપરીયાએ પોતાની પત્ની શીતલ (જાનુ એન્ટરપ્રાઈઝનાં પ્રોપરાઇટર)ના નામે ૧ કરોડની અને તેના ભાઈ સંજય (સિદ્ધાર્થ ફેશનના પ્રોપરાઇટર)નાં નામે ૭૫ લાખની લોન લીધી હતી. પોલીસે અશોક કાનપરીયાની ધરપકડ કરી હતી. અશોક પહેલા આ કૌભાંડમાં તેની પત્ની, ભાઇ સહિતનાં સગા સંબંધીઓ મળી ૨૮ વ્યક્તિની ધરપકડ થઇ ચૂકી છે.