ગાંધીનગર ગાંધીનગર તાલુકામાં દસ્તાવેજની નોંધણી અર્થે આવનાર પક્ષકારોને ભારે ભીડ ભાડ નો સામનો ન કરવો પડે અને દસ્તાવેજ નોંધણીની પ્રક્રિયાને ઝડપી બનાવવાના હેતુથી ગાંધીનગરના બહુમાળી ભવન, સેક્ટર ૧૧ ખાતે સબ રજિસ્ટ્રારની બે નવી કચેરીનો આરંભ કરાયો છે. આજે સી.સી.ટી.વી કેમેરાથી મોનિટરિંગ વ્યવસ્થાથી અત્યાધુનિક બન્ને સબ રજિસ્ટ્રાર કચેરીનો આરંભ ગાંધીનગર ઉત્તરના ધારાસભ્ય રીટા પટેલ અને ગાંધીનગર દક્ષિણના ધારાસભ્ય અલ્પેશ ઠાકોરના હસ્તે કરાયો હતો. પાટનગર ગાંધીનગરમાં શહેરીકરણના વિકાસને પરીણામે સબ રજિસ્ટ્રાર કચેરી ગાંધીનગરમાં દસ્તાવેજાેની નોંધણી માં સતત વધારો થઈ રહ્યો છે. ગત વર્ષે સબ રજિસ્ટ્રાર કચેરી ગાંધીનગર ખાતે કુલ ૬૦ હજાર કરતાં વધુ દસ્તાવેજાેની નોધણી કરવામાં આવી છે. સમગ્ર ગાંધીનગર તાલુકાના દસ્તાવેજાે ફક્ત એક જ સબ રજિસ્ટ્રાર કચેરી કે જે જિલ્લા સેવા સદન, ગાંધીનગરના ભોંયતળીયે સ્થિત છે ત્યાં જ નોંધાતા હતા. જેથી દસ્તાવેજની નોંધણી અર્થે આવનાર પક્ષકારોને ભારે ભીડભાડનો સામનો કરવો પડતો હતો. દસ્તાવેજની નોંધણીની પ્રક્રિયામાં પણ ભારે ધસારાના લીધે વિલંબ થતો અને પક્ષકારોને લાંબો સમય રાહ જાેવી પડતી હતી. ગાંધીનગરના નાગરિકો સરળતાપૂર્વક અને ચોક્કસ સમયે સગવડપૂર્વક દસ્તાવેજાેની નોંધણી કરાવી શકે તે માટે રાજ્ય સરકારે સબ રજિસ્ટ્રાર કચેરી ગાંધીનગરને તા.૧/૧/૨૦૨૪ થી ત્રણ ઝોનમાં વિભાજીત કરી છે. જે અન્વયે ગાંધીનગર તાલુકાને ત્રણ ઝોનમાં વિભાજીત કરી દસ્તાવેજની નોંધણીનું કાર્યભારણ કોઇ એક કચેરી પર ન આવે તથા ગાંધીનગર તાલુકા હેઠળના વિસ્તારો ત્રણ અલગ અલગ ઝોનમાં વહેંચાતા નોંધણીની પ્રક્રિયા ઝડપી અને સરળ થઇ શકશે. સબ રજિસ્ટ્રાર કચેરી ગાંધીનગર ઝોન-૧ અને ઝોન-૨ની નવી કચેરીનું નિર્માણ રૂ.૧ કરોડ ૧૩ લાખના ખર્ચે કરાયું છે. આ નવી કચેરીઓ ગાંધીનગર બહુમાળી ભવનમાં પ્રથમ તથા બીજા માળે કાર્યરત કરાઇ છે. નવનિર્મિત કચેરીઓમાં દસ્તાવેજની નોંધણી માટે આવતા પક્ષકારોને કોઇ પણ પ્રકારની મુશ્કેલી ન પડે તે માટે સ્લોટ મુજબ પક્ષકારોને બેસવા માટે અલગ એ.સી. વાળા વેઇટિંગ રૂમની સુવિધા કરાઇ છે. આ સિવાય પણ બીજી અનેક નાનીમોટી સુવિધાઓ આ નવી સબ રજિસ્ટ્રાર કચેરીમાં છે.