મુંબઇ 

ટેલિવિઝન એક્ટર સમય શાહ હાલ સીરિયલ 'તારક મહેતા કા ઉલ્ટા ચશ્મા'માં ગોગીના રોલમાં જોવા મળે છે. સીરિયલમાં 'શેર પુત્તર' કહેવાતા ગોગીને રિયલ લાઈફમાં ગુંડાઓ જાનથી મારી નાખવાની ધમકી આપી રહ્યા છે. 27 ઓક્ટોબરના રોજ યુવકોના એક ટોળાએ સમય શાહને ધાકધમકી આપી હતી અને ગાળાગાળી પણ કરી હતી. સમય શાહ મુંબઈના બોરીવલીમાં જે બિલ્ડિંગમાં રહે છે ત્યાં જ તેની સાથે આ ઘટના બની હતી. આ પહેલીવાર નથી, આવી ઘટના સમય સાથે ત્રીજીવાર બની છે.

સમયે આ મામલે બોરીવલી પોલીસ સ્ટેશનમાં ફરિયાદ નોંધાવી છે. જો કે, હજી સુધી એ શખ્સોની ઓળખ નથી થઈ. પરંતુ તેમાંથી એકનો ચહેરો બિલ્ડિંગના CCTV કેમેરામાં કેદ થયો હતો. આ CCTV ફૂટેજના આધારે ફરિયાદ નોંધવામાં આવી છે. પોતાના ફેન્સ અને ફોલોવર્સને આ ઘટના વિશેની જાણકારી આપતાં સમયે CCTV ફૂટેજમાંથી એ શખ્સની તસવીર લઈને ઈન્સ્ટાગ્રામ સ્ટોરીમાં પોસ્ટ કરી છે. સાથે જ તેણે ઘટના વિશે પણ લખ્યું છે.

તસવીર શેર કરતાં ગોગીએ લખ્યું, "આ શખ્સ બે દિવસ પહેલા મારા બિલ્ડિંગમાં આવ્યો હતો અને વિના કારણે મને અપશબ્દો બોલવા લાગ્યો હતો. મને નથી ખબર કે આ શખ્સ કોણ છે? મારી સાથે ગાળાગાળી કરવા પાછળનું કારણ શું છે? તેણે મને જાનથી મારી નાખવાની ધમકી પણ આપી છે. આ માહિતી હું આપ સૌને આપી રહ્યો છું કારણકે મને લાગે છે કે આ યોગ્ય છે, જેથી મને અને મારા પરિવારને કંઈ થાય તો કામ લાગે. આભાર." સમયની આ પોસ્ટથી ખાસ કરીને તેના ફેન્સને આઘાત લાગ્યો છે.

ઉલ્લેખનીય છે કે, સમય શાહ છેલ્લા 12 વર્ષથી સીરિયલ 'તારક મહેતા કા ઉલ્ટા ચશ્મા' સાથે જોડાયેલો છે. સીરિયલમાં તે ગુરુચરણ સિંહ સોઢી ઉર્ફે ગોગીનો રોલ કરે છે. ગોગી, રોશન સિંહ સોઢી અને રોશન કૌર સોઢીનો દીકરો અને ગોકુલધામ સોસાયટીની ટપ્પુ સેનાનો મેમ્બર છે. જણાવી દઈએ કે, સીરિયલમાં ગોગીના માતા-પિતાનો રોલ એક્ટ્રેસ જેનિફર મિસ્ત્રી અને બલવિંદર સિંહ સૂરી કરે છે. બલવિંદરે હાલમાં જ 'તારક મહેતા..'માં રોશન સિંહ સોઢી તરીકે એન્ટ્રી કરી છે. પહેલા આ રોલ એક્ટર ગુરુચરણ સિંહ કરતો હતો.