શહેરા

પંચમહાલ જિલ્લાના શહેરા નગરપાલિકાના સભાખંડ ખાતે પ્રાંત અધિકારી જય બારોટના અધ્યક્ષ સ્થાને પ્રથમ અઢી વર્ષ માટે શહેરા નગરપાલિકાના પ્રમુખ અને ઉપપ્રમુખની ચુંટણી પ્રક્રિયા હાથ ધરવામાં આવી હતી, જેમાં ભાજપના મેન્ડેટ મુજબના નામ જાહેર થયા બાદ અને અપક્ષ દ્વારા કોઈપણ સભ્યએ ઉમેદવારી નહીં નોંધાવતા ભાજપના પ્રમુખ અને ઉપપ્રમુખની સર્વાનુમતે વરણી કરવામાં આવી હતી. જેમાં અનુસૂચિત જનજાતિની સ્ત્રી અનામત બેઠક હોવાના કારણે વોર્ડ નંબર-૧ ના ચૂંટાયેલા સભ્ય ઉર્મિલાબેન નરેન્દ્રકુમાર નાયકાની પ્રમુખ પદે તો ઉપપ્રમુખ તરીકે હિંમતસિંહ જેસીંગભાઈ પગીની વરણી કરવામાં આવી હતી,જ્યારે પાલિકાના પ્રમુખ,ઉપપ્રમુખની સાથે સાથે કારોબારી અધ્યક્ષ, શાસક પક્ષના નેતા અને દંડકની પણ વરણી કરાઈ હતી,જેમાં કારોબારી અધ્યક્ષ વિવેક ગિરીશકુમાર પંચાલ, શાસક પક્ષના નેતા તરીકે વિમલકુમાર પરમાનંદ ખુશલાણી અને દંડક તરીકે સુરેશકુમાર કાળુભાઈ બારીયાની વરણી કરવામાં આવી હતી. આમ શહેરા નગરપાલિકાના પ્રમુખ-ઉપપ્રમુખ અને અન્ય હોદેદારોના નામોની સર્વાનુમતે વરણી કરાતા પાલિકાના સભ્યો, ભાજપના કાર્યકરો તેમજ હોદ્દેદારોએ તેમને આવકાર્યા હતા અને તેઓને અભિનંદન પાઠવી ફુલહાર પહેરાવી મોઢું મીઠું કરાવીને વધાવી લીધા હતા. આમ શહેરા નગરપાલિકાની પ્રમુખ-ઉપપ્રમુખની ચુંટણી ચુસ્ત પોલીસ બંદોબસ્ત વચ્ચે શાંતિપુર્ણ માહોલમાં સંપન્ન થઈ હતી. નોંધનીય છેકે ગ્રામ પંચાયતમાંથી શહેરા નગરપાલિકામાં ફેરવાયા બાદ આજદિન સુધી સતત ચોથી વખત ભાજપે સત્તા હાંસલ કરી પોતાનું શાસન જાળવી રાખ્યું છે,જેથી એવું કહી શકાય કે શહેરા નગરપાલિકામાં ભાજપની ભારે બહુમતી હોવાથી ભાજપ દબદબો જળવાઈ રહ્યો છે.