TMC-AAP નહી જોડાય, લોકસભા ચૂંટણી પછી બીજી વખત ગઠબંધનની બેઠક

લોકસભા ચૂંટણી 2024 પછી બીજી વખત, I.N.D.I.A. ગઠબંધનના નેતાઓ 19 જુલાઈ સાંજે બેઠક યોજી રહ્યા છે. જોકે, આ બેઠકમાં તૃણમૂલ કોંગ્રેસ અને આમ આદમી પાર્ટી ભાગ લેશે નહીં તેમ જાણવા મળે છે.

સૂત્રોના જણાવ્યા અનુસાર, લોકસભામાં વિપક્ષના નેતા રાહુલ ગાંધીએ તમિલનાડુના મુખ્યમંત્રી એમકે સ્ટાલિન સહિત ઘણા નેતાઓ સાથે વાત કરી છે. કોંગ્રેસ મહાસચિવ કેસી વેણુગોપાલે પણ કોંગ્રેસ અધ્યક્ષ મલ્લિકાર્જુન ખડગેના ઘરે યોજાનારી આ બેઠકમાં તમામ પક્ષોના નેતાઓને આમંત્રણ આપ્યું છે. આ બેઠક એવા સમયે થઈ રહી છે જ્યારે ચોમાસુ સત્ર શરૂ થવાનું છે અને બિહારમાં મતદાર યાદીની વિશેષ સુધારણા પ્રક્રિયા પર હોબાળો થઈ રહ્યો છે.

I.N.D.I.Aની છેલ્લી બેઠક આ વર્ષે 3 જૂને યોજાઈ હતી. જેમાં કેન્દ્ર સરકાર તરફથી 'ઓપરેશન સિંદૂર' પર સંસદનું ખાસ સત્ર બોલાવવાની માંગ કરવામાં આવી હતી. આ પહેલા, 5 જૂન 2024ના રોજ લોકસભા ચૂંટણી અંગે એક બેઠક યોજાઈ હતી.

તૃણમૂલ કોંગ્રેસ 21 જુલાઈએ 'શહીદ દિવસ' મનાવી રહી છે, તેથી તેના નેતાઓ કોલકાતામાં વ્યસ્ત રહેશે. આ દરમિયાન, AAP ગુજરાત અને અન્ય રાજ્યોમાં તેના વિસ્તરણ અભિયાનમાં વ્યસ્ત છે. AAPએ ઘણા રાજ્યોમાં કોંગ્રેસ સાથે સીધી લડાઈનો માર્ગ પસંદ કર્યો છે અને પાર્ટી કહે છે કે I.N.D.I.A. ગઠબંધન ફક્ત લોકસભા ચૂંટણી સુધી મર્યાદિત હતું.જોકે, વિપક્ષના નેતાઓનું કહેવું છે કે કેટલાક પક્ષો બેઠકમાં હાજરી ન આપે તો પણ વિપક્ષ સંસદમાં એક રહેશે.