૫૦ વર્ષનું આયોજન

અમદાવાદથી આશરે 335 કિલોમીટર દૂર આવેલા ભૂજમાં ન્યૂ ભૂજ રેલવે સ્ટેશનનું રિડેવલપમેન્ટ કાર્ય ઝડપી ગતિએ આગળ વધી રહ્યું છે. પશ્ચિમ રેલવે દ્વારા હાથ ધરાયેલા આ મહત્વાકાંક્ષી પ્રોજેક્ટ અંતર્ગત ન્યૂ ભૂજ રેલવે સ્ટેશનને અતિ આધુનિક સુવિધાઓથી સજ્જ બનાવવામાં આવી રહ્યું છે. રેલવેના અધિકારીઓના જણાવ્યા અનુસાર, આ સ્ટેશનના નિર્માણમાં પેરિસના વિશ્વવિખ્યાત એફિલ ટાવર જેટલા જ પ્રમાણમાં સ્ટીલનો ઉપયોગ કરવામાં આવ્યો છે, જે તેની મજબૂતી અને આધુનિક ડિઝાઇનને દર્શાવે છે.અમદાવાદના કાલુપુર અને સાબરમતી રેલવે સ્ટેશન બાદ ન્યૂ ભૂજ રેલવે સ્ટેશનને પશ્ચિમ રેલવેનું સૌથી આધુનિક સ્ટેશન ગણવામાં આવી રહ્યું છે. સ્ટેશનની ડિઝાઇન અને પ્લાનિંગ આવનારા 50 વર્ષોની જરૂરિયાતોને ધ્યાનમાં રાખીને તૈયાર કરવામાં આવી છે. મુસાફરોને વધુ સુવિધાજનક અને સુરક્ષિત અનુભવ મળે તે માટે વિશાળ કોન્કોર્સ, આધુનિક વેઇટિંગ એરિયા, લિફ્ટ-એસ્કેલેટર, પાર્કિંગ સુવિધા તેમજ વ્યાવસાયિક પ્રવૃત્તિઓ માટે અલગ જગ્યા તૈયાર કરવામાં આવી રહી છે.અત્યાર સુધીમાં રિડેવલપમેન્ટનું 75 ટકાથી વધુ કામ પૂર્ણ થઈ ગયું છે. જો પ્રોજેક્ટ યોજના મુજબ આગળ વધતો રહેશે તો એપ્રિલ 2026 સુધીમાં ન્યૂ ભૂજ રેલવે સ્ટેશન સંપૂર્ણ રીતે તૈયાર થઈ જશે. કચ્છના અર્થતંત્રને ગતિ આપવા માટે આ સ્ટેશન મહત્વપૂર્ણ ભૂમિકા ભજવશે, કારણ કે તે પ્રવાસન, વેપાર અને ઉદ્યોગોને નવી દિશા આપશે.આ પ્રોજેક્ટની પ્રગતિ અંગે માહિતી મેળવવા દિવ્ય ભાસ્કરે પશ્ચિમ રેલવેના અમદાવાદ મંડળના DRM વેદ પ્રકાશ અને જનસંપર્ક અધિકારી અજય સોલંકી સાથે વિશેષ વાતચીત કરી હતી. અધિકારીઓએ વિશ્વાસ વ્યક્ત કર્યો કે ન્યૂ ભૂજ રેલવે સ્ટેશન ભવિષ્યમાં કચ્છ માટે પરિવહનનું મુખ્ય કેન્દ્ર બનશે.