જો તમે વારંવાર હાઈવે પર મુસાફરી કરતા હોવ તો આ સમાચાર તમારા માટે ખૂબ જ મહત્વપૂર્ણ છે. ટોલ પ્લાઝા પર લાગતી લાંબી લાઈનો અને છૂટા પૈસાની માથાકૂટમાંથી હવે કાયમી મુક્તિ મળવા જઈ રહી છે. ડિજિટલ ઇન્ડિયા મિશન અંતર્ગત સરકાર ટોલ ટેક્સ કલેક્શનમાં એક ઐતિહાસિક ફેરફાર કરવાના મૂડમાં છે. શું હવે ટોલ નાકા પર રોકડ વ્યવહાર સંપૂર્ણપણે ભૂતકાળ બની જશે? શું છે સરકારની નવી યોજના? જુઓ આ ખાસ રિપોર્ટમાં

દેશભરમાં ફાસ્ટેગ (FASTag) ફરજિયાત થયા બાદ ટોલ પ્લાઝા પર ભીડ ઓછી જરૂર થઈ છે, પરંતુ સમસ્યા હજુ પૂરેપૂરી હલ નથી થઈ. આજે પણ ઘણા વાહનો કેશ લેનમાં ઉભા રહે છે, જેના કારણે ટ્રાફિક જામની સ્થિતિ સર્જાય છે.

હવે આ સમસ્યાના કાયમી ઉકેલ માટે, માર્ગ પરિવહન અને રાજમાર્ગ મંત્રાલય એક મોટી યોજના પર કામ કરી રહ્યું છે. સૂત્રોના જણાવ્યા અનુસાર, સરકાર ટોલ પ્લાઝાને ૧૦૦ ટકા કેશલેસ બનાવવા તરફ આગળ વધી રહી છે. જેનો સીધો અર્થ એ છે કે ટોલ પર જે એકાદ-બે 'કેશ લેન' (Cash Lane) બચી છે, તેને પણ હવે હંમેશ માટે બંધ કરી દેવામાં આવશે.

માત્ર ફાસ્ટેગ જ નહીં, સરકાર હવે તેનાથી પણ આગળ વધીને GPS-આધારિત ટોલિંગ સિસ્ટમ અને ઓટોમેટિક નંબર પ્લેટ રેકગ્નિશન (ANPR) જેવી અત્યાધુનિક તકનીકો પર પણ વિચાર કરી રહી છે. આ નવી સિસ્ટમમાં તો ટોલ બૂથની પણ જરૂર નહીં રહે, સીધા તમારા બેંક એકાઉન્ટમાંથી જ પૈસા કપાઈ જશે.

જોકે, આ ૧૦૦% કેશલેસ સિસ્ટમ કઈ તારીખથી લાગુ થશે તેની સત્તાવાર જાહેરાત હજુ બાકી છે. પરંતુ, સરકારની તૈયારીઓ જોતા એવું લાગે છે કે ખૂબ જ ટૂંક સમયમાં આ અંગે મોટો નિર્ણય લેવાઈ શકે છે.

જે વાહનચાલકો હજુ પણ રોકડ પર નિર્ભર છે અથવા જેમણે ફાસ્ટેગ નથી લગાવ્યું, તેમના માટે હવે ડિજિટલ માધ્યમ અપનાવવું અનિવાર્ય બની જશે. નહિંતર, ભવિષ્યમાં હાઈવે પર મુસાફરી કરવી મુશ્કેલ બની શકે છે