ભારતીય સિનેમાની સૌથી મોટી સુપરસ્ટાર દીપિકા પાદુકોણે તેની વૈશ્વિક ઓળખમાં વધુ એક મોરપીંછ ઉમેર્યું છે. દીપિકા ૨૦૨૫ LVMH પ્રાઇઝના ફાઇનલ માટે લુઇસ વિટનના એમ્બેસેડર અને જ્યુરી સભ્ય તરીકે પસંદગી પામી છે, જેનાથી તે આ પ્લેટફોર્મ પર ભારતનું પ્રતિનિધિત્વ કરનારી પ્રથમ ભારતીય બની છે. દીપિકાએ તેની અભિનય કારકિર્દીમાં સતત બ્લોકબસ્ટર ફિલ્મો આપીને અને હજારો કરોડની કમાણી કરીને સાબિત કર્યું છે કે તે ખરેખર ભારતીય સિનેમાનો વૈશ્વિક ચહેરો છે.

મનોરંજન ઉદ્યોગમાં તેના યોગદાન ઉપરાંત, દીપિકાએ ફેશન અને લક્ઝરીની દુનિયામાં પણ ભારતની ઓળખને એક નવું પરિમાણ આપ્યું છે. ૨૦૨૨માં, લુઇસ વિટન અને કાર્ટિયર જેવા વૈશ્વિક લક્ઝરી ફેશન હાઉસે દીપિકાને તેમની બ્રાન્ડ એમ્બેસેડર તરીકે સાઇન કરીને ઇતિહાસ રચ્યો હતો. તે દેશમાં આવી બ્રાન્ડ સાથે જોડાનારી પ્રથમ ભારતીય બની હતી, જેનાથી અન્ય ભારતીય કલાકારો માટે પણ આંતરરાષ્ટ્રીય સ્તરે તકોના દ્વાર ખુલ્યા હતા. ગયા વર્ષે, દીપિકા ૨૦૨૪ LVMH પ્રાઇઝ ફોર યંગ ફેશન ડિઝાઇનર્સની સ્પેશિયલ જ્યુરીનો પણ ભાગ હતી.

આ જાહેરાત કરતા, બ્રાન્ડે લખ્યું, "દીપિકા પાદુકોણ લુઇસ વિટન માટે: ૨૦૨૫ LVMH પ્રાઇઝ જ્યુરી સભ્ય. અમને જાહેરાત કરતા આનંદ થાય છે કે આઇકોનિક દીપિકા પાદુકોણ આ વર્ષના LVMH પ્રાઇઝ ફાઇનલના જ્યુરી સભ્ય તરીકે જોડાઈ છે. તેના શાનદાર પર્ફોર્મન્સ અને વૈશ્વિક હાજરી માટે જાણીતી, દીપિકા આંતરરાષ્ટ્રીય પ્લેટફોર્મ પર વિશ્વભરના દર્શકોને પ્રેરણા આપે છે."

ફિલ્મોની વાત કરીએ તો, દીપિકા પાસે આગામી સમયમાં ઘણા મોટા પ્રોજેક્ટ્સ છે. તે ડિરેક્ટર એટલી સાથે ફિલ્મ AA22XA6 માં અલ્લુ અર્જુન સાથે કામ કરવા જઈ રહી છે. આ ઉપરાંત, તેની બ્લોકબસ્ટર હિટ ફિલ્મ 'કલ્કી ૨૮૯૮ એડી' ની સિક્વલ પણ છે, જેમાં તે પ્રભાસ સાથે જોવા મળશે. ચાહકો તેની આગામી ફિલ્મોની આતુરતાથી રાહ જોઈ રહ્યા છે.