સુરત મહાનગરપાલિકાની ચૂંટણી માટે ભાજપાના ઉમેદવારોની ભાજપા મોવડીમંડળ દ્વારા ગુરુવારે રાત્રે જાહેર કરવામાં આવશે તેવી વાઇરલ થયેલી વાતોની બીજી તરફ એવી એક સંગીન માહિતી મળી છે કે ઉમેદવારોની યાદી જાહેર કરવામાં અતિશય વિલંબ કરવો એ ભાજપાની રણનીતિનો એક ભાગ પણ હોઇ શકે. જે ઉમેદવારોને પસંદ કરવામાં આવ્યા છે તેમને વ્યક્તિગત રીતે ટેલિફોનિક જાણ કરી દઇને ઉમેદવારી માટે ખાનગી રાહે તૈયારી કરી દેવા માટે જણાવી દેવામાં આવ્યું હોઇ શકે અને બીજી તરફ આમ આદમી પાર્ટી અને કોંગ્રેસ કે જે ભાજપાના ઉમેદવારોની યાદી જાહેર થાય તેની રાહ જાેઇને બેઠા છે, સ્વાભાવિક છે કે ભાજપાની યાદી જાહેર થાય તો અનેક અસંતુષ્ઠો બળવાખોરી કરી શકે અને કોંગ્રેસ કે આમ આદમી પાર્ટી તેને ઉમેદવાર બનાવીને ભાજપા માટે કઠિન પરિસ્થિતિ પેદા કરી શકે. આવી શક્યતાઓ નિવારવા માટે ભાજપાની યાદી જાહેર કરવામાં વિલંબ કરાયો પણ વ્યક્તિગત રીતે ઉમેદવારોને જાણ કરી દેવામાં આવી હોઇ શકે.