તહેરાન,ઈરાને રવિવારે ઈઝરાયલ અને અમેરિકા સામેના યુદ્ધમાં પહેલીવાર તેલ અવીવને નિશાન બનાવીને સેજિલ બેલિસ્ટિક મિસાઈલ છોડવામાં આવી. આ પહેલીવાર છે, જ્યારે ઈરાને ઈઝરાયલ સામે આ મિસાઈલનો ઉપયોગ કર્યો છે. ઈરાને ઈઝરાયલ અને અમેરિકા સાથેના યુદ્ધ દરમિયાન વિવિધ ખતરનાક મિસાઈલોથી દુશ્મનના લક્ષ્યો પર વિનાશ વેર્યો છે, ત્યારે સેજિલ બેલિસ્ટિક મિસાઈલનો પહેલીવાર ઉપયોગ કરવામાં આવ્યો છે. આનાથી તેલ અવીવમાં ગભરાટ ફેલાયો છે. ઈરાનના ઈસ્લામિક રિવોલ્યુશનરી ગાર્ડ કોર્પ્સએ દાવો કર્યો હતો કે સેજિલ બેલિસ્ટિક મિસાઈલ ઉપરાંત, તેણે ઈઝરાયલ પરના હુમલામાં ૨-ટન વોરહેડ ધરાવતી સુપર-હેવી મિસાઈલ ખોરમશહર પણ છોડી હતી. વધુમાં ખૈબર શેકાન, કાદર અને ઈમાદ મિસાઈલ પણ છોડવામાં આવી હતી. આ હુમલાઓમાં ઈઝરાયલી લશ્કરી સ્થાપનો, હવાઈ સંરક્ષણ પ્રણાલીઓ અને શહેરોને નિશાન બનાવવામાં આવ્યા હતા. આ હુમલાઓ બાદ, તેલ અવીવ, બીરશેબા અને અન્ય વિસ્તારોમાં હવાઈ હુમલાના સાયરન વાગ્યા. ઈરાને આ હુમલાઓને ઓપરેશન “ટ્રૂ પ્રોમિસ“ ના વિવિધ તરંગોના ભાગરૂપે વર્ણવ્યા હતા, જેમાં ક્લસ્ટર વોરહેડ્સ, મલ્ટી-વોરહેડ્સ અને હાઇ-સ્પીડ મિસાઇલોનો ઉપયોગ કરવામાં આવ્યો હતો. ઈરાનના જણાવ્યા મુજબ, ઇઝરાયલે આ મિસાઇલોને અટકાવવા માટે આયર્ન ડોમ, ડેવિડ્સ સ્લિંગ, એરો ૨/૩ અને અમેરિકન થાડ અને પેટ્રિઓટ મિસાઇલો જેવા બહુ-સ્તરીય સંરક્ષણનો ઉપયોગ કર્યો હતો, પરંતુ ઘણી મિસાઇલો ઘૂસી ગઈ અને ઇઝરાયલી ઊંચી ઇમારતો, નાગરિક વિસ્તારો અને લશ્કરી સ્થળો સહિત લક્ષ્યોને ભારે નુકસાન પહોંચાડ્યું. ઈરાનનો દાવો છે કે આ હુમલાઓએ ઇઝરાયલી હવાઈ સંરક્ષણને ભારે નુકસાન પહોંચાડ્યું છે.