ટેરિફમાં આપવામાં આવેલી 90 દિવસની રાહત આગામી 9 જુલાઈના રોજ સમાપ્ત થાય છે 

10 ટકા ટ્રમ્પ ટેરિફ ઘણા દેશોના નિકાસ વેપાર પર બોજો વધારશે

અમેરિકાના પૂર્વ પ્રમુખ ડોનાલ્ડ ટ્રમ્પ દ્વારા વિવિધ દેશો પર લાદવામાં આવેલા રેસિપ્રોકલ ટેરિફમાં આપવામાં આવેલી 90 દિવસની રાહત આગામી 9 જુલાઈના રોજ સમાપ્ત થવા જઈ રહી છે. આ સમયમર્યાદા પૂરી થાય તે પહેલાં જ અમેરિકાએ એક આશ્ચર્યજનક જાહેરાત કરી છે, જેણે વૈશ્વિક વ્યાપાર જગતમાં હલચલ મચાવી દીધી છે.અમેરિકાના ટ્રેઝરી સેક્રેટરી સ્કૉટ બેસેન્ટે આ અંગે માહિતી આપતા જણાવ્યું હતું કે, આગામી 1 ઓગસ્ટથી વિશ્વના આશરે 100 દેશોમાંથી થતી આયાત પર 10 ટકાનો ટ્રમ્પ ટેરિફ લાદવામાં આવશે. ગ્લોબલ ટ્રેડ સ્ટ્રેટેજીનો ઉલ્લેખ કરતા બેસેન્ટે સ્પષ્ટ કર્યું કે, આ બેઝલાઈન ટેરિફ વ્યાપક સ્તરે લાગુ પડશે. તેમણે ઉમેર્યું કે, આ ટેરિફ એવા દેશો પર પણ લાગુ થશે જેમની સાથે વોશિંગ્ટન હાલ વેપાર વાટાઘાટો કરી રહ્યું છે. બેસેન્ટે જણાવ્યું, "અમે જોઈશું કે પ્રમુખ ટ્રમ્પ વેપાર કરાર કરનારા દેશો સાથે કેવો વ્યવહાર રાખે છે. મારા મતે, અમે 100 દેશો પર લઘુત્તમ 10 ટકાનો ટ્રમ્પ ટેરિફ લાદીશું."સ્કૉટ બેસેન્ટની આ સ્પષ્ટતાથી ભારતની ચિંતા વધી છે, કારણ કે આ યાદીમાં ભારતનો પણ સમાવેશ થવાની શક્યતા છે. જોકે, આ અંગેનો અંતિમ નિર્ણય પૂર્વ પ્રમુખ ટ્રમ્પ દ્વારા જ લેવામાં આવશે.આ ઉપરાંત, ડોનાલ્ડ ટ્રમ્પે 12 દેશો પર ટેરિફ બોમ્બ ફોડવાની તૈયારી પણ કરી છે, જેની જાહેરાત સોમવારે થવાની સંભાવના છે. રિપોર્ટ્સ અનુસાર, ટ્રમ્પે જણાવ્યું હતું કે તેમણે આશરે એક ડઝન દેશો માટે વેપાર પત્ર પર હસ્તાક્ષર કર્યા છે. આ યાદીમાં સામેલ ઘણા દેશોને આ પત્ર 'ટેક ઈટ ઓર લીવ ઈટ' (સ્વીકાર કરો અથવા છોડી દો) ના અલ્ટીમેટમ સાથે આગામી સપ્તાહના પ્રથમ દિવસે મોકલવામાં આવશે. જોકે, આ યાદીમાં કયા દેશોનો સમાવેશ થાય છે તેની જાહેરાત હાલ કરવામાં આવી નથી. આ નિર્ણય વૈશ્વિક વેપાર સંબંધોમાં નવા તણાવનું કારણ બની શકે છે.