વોશિંગ્ટન, યુએસએ ગેરકાયદેસર ઇમિગ્રેશન અને ગુનાઓ પરની તેની કાર્યવાહીને વધુ તીવ્ર બનાવી છે, જેમાં ૮૯ ભારતીય નાગરિકોને “સૌથી ખરાબમાં ખરાબ” યાદીમાં ઉમેરી દેવાયા છે. આ યાદી યુએસ ડિપાર્ટમેન્ટ ઓફ હોમલેન્ડ સિક્યુરિટી દ્વારા એક નવી જાહેર વેબસાઇટ પર જાહેર કરવામાં આવી હતી જેમાં ગંભીર ગુનાઓમાં દોષિત ગેરકાયદેસર ઇમિગ્રન્ટ્સનું વર્ણન કરાયું છે. વિભાગ દ્વારા શરૂ કરાયેલી આ વેબસાઇટમાં ગુનેગારોના નામ, ફોટોગ્રાફ્સ, રાષ્ટ્રીયતા અને ગુનેગારો દ્વારા કરવામાં આવેલા ગુનાઓની વિગતો જાહેર કરવામાં આવી છે. વિભાગ જણાવે છે કે આ પહેલનો હેતુ અમેરિકન નાગરિકોને બતાવવાનો છે કે કયા ગુનેગાર ગેરકાયદેસર ઇમિગ્રન્ટ્સની ધરપકડ કરવામાં આવી છે અને તેમના સમુદાયોમાંથી દૂર કરવામાં આવ્યા છે. હત્યા, જાતીય ગુનાઓ, ડ્રગ હેરફેર અને હિંસક ગુનાઓમાં સંડોવાયેલા લોકો પ્રથમ સૂચિબદ્ધ છે. ડિપાર્ટમેન્ટ ઓફ હોમલેન્ડ સિક્યુરિટી એ સોશિયલ મીડિયા પ્લેટફોર્મ એક્સ પર પણ આ વેબસાઇટની માહિતી શેર કરી અને કહ્યું કે હવે સામાન્ય લોકો પોતે જાેઈ શકે છે કે કયા ગુનેગારો પકડાયા છે, તેમણે કયા ગુના કર્યા છે અને કયા વિસ્તારોમાંથી તેમને દૂર કરાયા છે. યાદીમાં સમાવિષ્ટ ૮૯ ભારતીય નાગરિકો પર જાતીય ગુનાઓ, બળાત્કાર, ડ્રગ્સની હેરાફેરી, ચોરી, ડીયુઆઇ , હિટ એન્ડ રન, દાણચોરી, છેતરપિંડી, લૂંટ, હુમલો, અપહરણ, મની લોન્ડરિંગ, ઘરેલુ હિંસા અને એક હત્યા જેવા ગંભીર આરોપો છે. આ બધા નામ એવા લોકોના છે જેમની અમેરિકામાં ધરપકડ કરવામાં આવી છે.