નવી દિલ્હી 

બીસીસીઆઈએ સેન્ટ્રલ કોન્ટ્રાક્ટના નિયમમાં ફેરફાર કર્યા છે. હવે ફક્ત 10 ટી-20 રમનાર ખેલાડીને પણ કોન્ટ્રાક્ટ મળી શકશે. પહેલાં વન-ડે અને ટેસ્ટ રમનાર ખેલાડીઓને જ કોન્ટ્રાક્ટ મળતો હતો. ટી-20ના વધતાં ક્રેઝને લીધે બોર્ડે આ નિર્ણય લીધો છે. બોર્ડ તરફથી પુરુષ ખેલાડીઓને ચાર કેટેગરી એ+, એ, બી અને સીમાં કોન્ટ્રાક્ટ અપાય છે. એ+ વાળા ખેલાડીઓને વાર્ષિક 7 કરોડ મળે છે. એ કેટેગરીમાં 5 કરોડ, બી કેટેગરીમાં 3 કરોડ અને સી કેટેગરીમાં વાર્ષિક 1 કરોડ રૂપિયા મળે છે.

સુપ્રીમકોર્ટ તરફથી રચાયેલી કમિટી ઓફ એડમિનિસ્ટ્રેટર્સ(સીઓએ)ના એ પ્રસ્તાવને બોર્ડે નકારી કાઢ્યો હતો જેમાં ટી-20ને સામેલ કરવા કહેવાયું હતું. જોકે નિયમોમાં ફેરફાર કરતાં 3 ટેસ્ટ કે 7 વન-ડે રમનાર ખેલાડીને કોન્ટ્રાક્ટ આપવાનો નિર્ણય લેવાયો હતો. જોકે ગત સિઝનમાં બોર્ડે અપવાદરૂપે વોશિંગ્ટન સુંદરને સી કેટેગરીનો કોન્ટ્રાક્ટ આપ્યો હતો. તે ટી-20માં સારું પ્રદર્શન કરે છે. બોર્ડના એક અધિકારીએ કહ્યું કે તેનાથી નાના ફોર્મેટના ખેલાડીને કોન્ટ્રાક્ટ આપી શકાશે. હાલ 27 પુરુષ ખેલાડીઓને સેન્ટ્રલ કોન્ટ્રાક્ટ અપાયો છે.



Comments

કોમેન્ટ પોસ્ટ કરવા માટે લાગિન કરો