સૌથી મુસ્લિમ દેશોની મુલાકાત લીધી

ગાઝિયાબાદમાં નકલી દૂતાવાસ ચલાવવા બદલ ધરપકડ કરાયેલા હર્ષવર્ધન જૈન છેલ્લા 10 વર્ષમાં 162 વાર વિદેશ પ્રવાસે ગયો હતો. તેણે ત્યાં કંપનીઓ બનાવી અને તેનો ઉપયોગ દલાલી માટે કર્યો. આ કેસનો પર્દાફાશ કરનાર નોઈડા STFના અધિકારીઓનું કહેવું છે કે તે હવાલા અને લાયઝનિંગના ધંધાનો મોટો ખેલાડી છે. તેના કૌભાંડના હજુ ઘણા ખુલાસા થવાના બાકી છે.

STF અનુસાર, હર્ષવર્ધન જૈન તાંત્રિક ગુરુ ચંદ્રસ્વામીના ઇન્ટરનેશનલ નેટવર્કનો ઉપયોગ પોતાના ધંધા માટે કરતો હતો. ચંદ્રસ્વામીએ જ તેને આંતરરાષ્ટ્રીય હથિયાર તસ્કર અદનાન ખશોગી સાથે મુલાકાત કરાવી હતી. આ સિવાય પણ તે વિદેશમાં અનેક મોટા અને જાણીતા લોકો સાથે ચંદ્રસ્વામી મારફતે મળ્યો હતો. STFની ટીમ તે મુલાકાતોની વિગતો પણ એકઠી કરી રહી છે.

વર્ષ 2000માં હર્ષવર્ધન જૈન ચંદ્રસ્વામીના સંપર્કમાં આવ્યો. ચંદ્રસ્વામીએ લંડનમાં હર્ષવર્ધનની મુલાકાત અદનાન અને અહેસાન સાથે કરાવી. અહેસાન સાથે મળીને હર્ષવર્ધને લંડનમાં એક ડઝનથી વધુ કંપનીઓ બનાવી, જેનો ઉપયોગ દલાલીમાં કરતો. વર્ષ 2006માં હર્ષવર્ધન દુબઈ જઈને વસ્યો. દુબઈમાં હર્ષવર્ધનની મુલાકાત શફીક અને ઈબ્રાહિમ સાથે થઈ. શફીક અને ઈબ્રાહિમ સાથે મળીને હર્ષવર્ધને દુબઈમાં પણ ઘણી કંપનીઓ બનાવી. આ ઉપરાંત તેણે અન્ય દેશોમાં પણ કંપનીઓ બનાવી.

STF અધિકારીઓએ હર્ષવર્ધનની વિદેશ યાત્રાઓ વિશે પણ માહિતી એકઠી કરી છે. પાસપોર્ટના રેકોર્ડ અનુસાર, 2005 થી 2015 દરમિયાન 10 વર્ષમાં તેણે કુલ 162 વખત વિદેશ યાત્રા કરી. આ સમયગાળામાં તે 19 દેશોમાં ગયો હતો. તે સૌથી વધુ 54 વખત UAE ગયો હતો, અને 22 વખત યુકેની યાત્રા કરી હતી.

આ કેસની તપાસ દરમિયાન STFને અત્યાર સુધીમાં 25થી વધુ કંપનીઓ વિશે માહિતી મળી છે, જેનો ડેટા હર્ષવર્ધન પાસે હતો. ઉપરાંત તે દેશ-વિદેશમાં 20થી વધુ બેન્ક ખાતાનો ઉપયોગ કરતો હતો.