કુન્હા કમિશને કહ્યું- સ્ટેડિયમ સુરક્ષિત નહીં

બેંગલુરુમાં રોયલ ચેલેન્જર્સ બેંગ્લોર ની વિક્ટ્રી ડે પરેડ દરમિયાન થયેલી ભાગદોડ અંગે કર્ણાટક સરકાર દ્વારા બનાવવામાં આવેલા જસ્ટિસ જોન માઈકલ કુન્હા કમિશનનો રિપોર્ટ શુક્રવારે જાહેર કરવામાં આવ્યો હતો. આમાં, સ્ટેડિયમને મોટા કાર્યક્રમો માટે સુરક્ષિત નહીં હોવાનું જાહેર કરવામાં આવ્યું છે.

રિપોર્ટમાં એમપણ કહેવામાં આવ્યું છે કે સ્ટેડિયમ એવી રીતે ડિઝાઇન કરવામાં આવ્યું નથી કે મોટી સંખ્યામાં લોકો ત્યાં સુરક્ષિત રીતે ભેગા થઈ શકે. સ્ટેડિયમમાં ભીડ નિયંત્રણ, પ્રવેશ અને બહાર નીકળવાની વ્યવસ્થા, પાર્કિંગ અને ઈમરજન્સી પ્લાન જેવી મૂળભૂત સુવિધાઓનો ગંભીર અભાવ છે. કમિશને વધુમાં કહ્યું છે કે, ભવિષ્યમાં, આવા મોટા કાર્યક્રમો ફક્ત એવા સ્થળોએ જ યોજવા જોઈએ જ્યાં આંતરરાષ્ટ્રીય સલામતી ધોરણો પૂરા થાય છે. ઉપરાંત, જરૂરી સુધારાઓ વિના જૂના સ્ટેડિયમમાં કોઈ મોટી ઇવેન્ટનું આયોજન ન કરવું જોઈએ.

મહિલા વનડે વર્લ્ડ કપની શરૂઆત અને સેમિફાઇનલ મેચો 30 સપ્ટેમ્બરથી 2 નવેમ્બર દરમિયાન સ્ટેડિયમમાં યોજાવાની હતી, પરંતુ હજુ સુધી તે સ્પષ્ટ નથી કે મેચો યોજાશે કે નહીં, આ ઉપરાંત, સમિતિએ આ ઘટના માટે RCB ફ્રેન્ચાઇઝી, તેમના ઇવેન્ટ પાર્ટનર DNA એન્ટરટેઇનમેન્ટ અને કર્ણાટક સ્ટેટ ક્રિકેટ એસોસિએશન ને જવાબદાર ઠેરવ્યા છે અને KSCAના પ્રમુખ રઘુરામ ભટ, ભૂતપૂર્વ સચિવ એ શંકર, ભૂતપૂર્વ ખજાનચી ES જયરામ, RCBના ઉપપ્રમુખ રાજેશ મેનન અને DNA એન્ટરટેઇનમેન્ટના વરિષ્ઠ અધિકારીઓ સામે કાર્યવાહી કરવાની ભલામણ કરી છે.

IPL 2025માં રોયલ ચેલેન્જર્સ બેંગ્લોર (RCB)ના પ્રથમ ટાઇટલ જીતના ઉજવણી દરમિયાન 4 જુલાઈના રોજ ચિન્નાસ્વામી સ્ટેડિયમની બહાર નાસભાગ મચી ગઈ હતી. આ અકસ્માતમાં 11 લોકોનાં મોત થયા હતા અને 50થી વધુ લોકો ઘાયલ થયા હતા.

આ પહેલા 17 જુલાઈના રોજ કર્ણાટક સરકારનો રિપોર્ટ ગુરુવારે સામે આવ્યો હતો. રિપોર્ટમાં અકસ્માત માટે RCBને જવાબદાર ઠેરવવામાં આવ્યું હતું. તેમાં કોહલીનો પણ ઉલ્લેખ હતો. કર્ણાટક સરકારે કહ્યું હતું કે RCB એ ચિન્નાસ્વામી ખાતે યોજાયેલી વિજય પરેડ માટે સરકાર પાસેથી કોઈ મંજુરી લીધી ન હતી.

જોકે, સરકારે એમ પણ કહ્યું હતું કે આ કાર્યક્રમ અચાનક રદ કરવાથી હિંસા થઈ શકે છે અને શહેરમાં કાયદો અને વ્યવસ્થાની સ્થિતિ બગડી હોત. સરકારે 15 જુલાઈના રોજ હાઈકોર્ટમાં રિપોર્ટ રજૂ કર્યો હતો