શહેરના મોટા ભાગના તમામ રોડ રસ્તા પાલિકાના તત્કાલીન પદાધિકારીઓના આદેશથી કોન્ટ્રાક્ટરો દ્વારા ખોદી નંખાયા છે. આવા ખોદાયેલા રોડની જે તે કામગીરી પૂરી થતાં ખોદાયેલા રસ્તા યોગ્ય પુરાણ નહીં કરી આડેધડ રીતે ખાડા પુરી દેવાયા બાદ બનાવવામાં આવેલા રોડ પર ગમે ત્યારે ભુવા પડી જતા હોય છે. પ્રતાપ નગર બાવરી કુંભારવાડા વિસ્તારમાંથી પાલિકાનું ટ્રેક્ટર રેતી ભરીને જતા ભારે વજનના કારણે રસ્તા વચ્ચે અચાનક પડેલા ભુવામાં પાલિકા તંત્રની પોલ ખુલ્લી પડી હતી.

ઉલ્લેખનીય છે કે પ્રતાપ નગર બાવરી કુંભારવાડામાં છેલ્લા બે મહિનામાં ત્રણ વાર રસ્તા બનાવવામાં આવ્યા હતા. તાજેતરની ત્રાહિમામ ગરમીમાં મોટાભાગના તમામ રોડ રસ્તા ભ્રષ્ટાચારી ડામરથી પીગળતા હોવાના કારણે રોડ રસ્તા પરથી વાહન ચલાવવું મુશ્કેલ બને છે. પ્રતાપ નગર બાવરી કુંભારવાડામાંથી વીએમસી (વડોદરા મહાનગર કોર્પોરેશન)ના એક ટ્રેક્ટર રેતી ભરીને ચાલક જઈ રહ્યો હતો. દરમિયાન રોડ રસ્તા વચ્ચેથી પસાર થતા જ યોગ્ય પુરાણ નહીં થયેલા રોડ પર ટ્રેક્ટરના ભારે વજનના કારણે અચાનક ભુવો પડી જતા ટ્રેક્ટરનું ટ્રેલર રેતી ભરેલી હાલતમાં ભુવામાં ખૂપી ગયું હતું. પરિણામે વાહન ચાલકોને પસાર થવામાં ભારે મુશ્કેલીનો સામનો કરવો પડ્યો હતો. સ્થાનિકોનું કહેવું હતું કે પાલિકા તંત્રના ભ્રષ્ટાચાર ના કારણે જ પાલિકાનું જ ટ્રેક્ટર ભુવામાં ફસાયુ હતું.