સેન્ચ્યુરીયન

સેન્ચ્યુરિયન ખાતે રમાયેલી ત્રીજી વનડે મેચમાં પાકિસ્તાને દક્ષિણ આફ્રિકાને ૨૮ રને હરાવ્યું હતુ. આ સાથે પાકિસ્તાને ત્રણ મેચની શ્રેણી ૨-૧થી જીતી લીધી હતી. પાકિસ્તાને ફખર ઝમનની ૧૦૧ રનની ઇનિંગના આભારી ૫૦ ઓવરમાં ૩૨૦ રન બનાવ્યા હતા. જેના જવાબમાં દક્ષિણ આફ્રિકાની ટીમ નિર્ધારિત ઓવરમાં ફક્ત ૨૯૨ રન જ બનાવી શકી. પાકિસ્તાનની આ જીતનો ફખર ઝમન અને બાબર આઝમ હિરો હતા. ફખરે ૧૦૪ બોલમાં ૧૦૧ રનની શાનદાર ઇનિંગ્સ રમી હતી. આ સમય દરમિયાન તેણે ૯ ચોગ્ગા અને ત્રણ છગ્ગા ફટકાર્યા હતા. આ તેની સતત બીજી સદી છે. આ પહેલા તેણે બીજી વનડેમાં ૧૯૩ રન બનાવ્યા હતા. ફખરે મેન ઓફ ધ સિરીઝનો ખિતાબ મેળવ્યો.

તે જ સમયે કેપ્ટન બાબર આઝમે ૮૨ બોલમાં ૯૪ રન બનાવ્યા. આ દરમિયાન તેણે સાત ચોગ્ગા અને ત્રણ છગ્ગા ફટકાર્યા હતા. બાબરની આ ઇનિંગ્સ માટે તેને મેન ઓફ ધ મેચનો ખિતાબ મળ્યો. બાબરના કેપ્ટન તરીકે વિદેશમાં આ પ્રથમ શ્રેણીનો વિજય છે. પહેલા બેટિંગ માટે આમંત્રણ આપ્યા બાદ પાકિસ્તાને સાત વિકેટે ૩૨૦ રનનો વિશાળ સ્કોર મેળવ્યો હતો. જેના જવાબમાં સાઉથ આફ્રિકા ૪૯.૩ ઓવરમાં ૨૯૨ રનમાં આઉટ થઈ ગયું. તેના માટે ઓપનર જાનેમન મલાને ૭૦, કાયલ વેરિનીએ ૬૨ અને એંડિલ ફેલુકવાયોએ ૫૪ રન બનાવ્યા. આ સાથે જ પાકિસ્તાન તરફથી મોહમ્મદ નવાઝ અને શાહીન શાહ આફ્રિદીએ ત્રણ વિકેટ ઝડપી હતી.