નવીદિલ્હી, મેગા એઆઇ ઇન્ડિયા ઇમ્પેક્ટ સમિટ આજે રાજધાની દિલ્હીમાં શરૂ થઈ રહી છે, જેમાં વિશ્વભરના અગ્રણી ટેક નેતાઓ અને નિષ્ણાતો ભાગ લેશે. પ્રધાનમંત્રી નરેન્દ્ર મોદીએ મુખ્ય કાર્યક્રમના ભાગ રૂપે એઆઇ ઇન્ડિયા એક્સ્પોનું ઉદ્ઘાટન કર્યું હતું.

સોશિયલ મીડિયા પ્લેટફોર્મ એકસ પર પ્રતિનિધિઓનું સ્વાગત કરતા, પીએમ મોદીએ કહ્યું હતું કે, આ સમિટમાં વિશ્વભરના લોકોનું આગમન ભારત માટે ગર્વની વાત છે અને દેશના યુવાનોની ક્ષમતાને પ્રતિબિંબિત કરે છે. આ પ્રસંગ એ વાતનો પુરાવો છેકે, ભારત વિજ્ઞાન અને ટેકનોલોજીના ક્ષેત્રમાં ઝડપથી પ્રગતિ કરી રહ્યું છે અને વૈશ્વિક વિકાસમાં મહત્વપૂર્ણ યોગદાન આપી રહ્યું છે.

વડાપ્રધાને વધુમાં જણાવ્યું હતું કે, ૧.૪ અબજ ભારતીયોની સામૂહિક શક્તિને કારણે, દેશ આજે એઆઇ પરિવર્તનમાં મોખરે છે. તેમણે ડિજિટલ જાહેર માળખાગત સુવિધા, મજબૂત સ્ટાર્ટઅપ ઇકોસિસ્ટમ અને અત્યાધુનિક સંશોધનને ભારતની એઆઇ પ્રગતિ માટે મુખ્ય શક્તિઓ તરીકે ટાંક્યા. એઆઈ ક્ષેત્રમાં ભારતની ઝડપી પ્રગતિ માત્ર મહત્વાકાંક્ષા જ નહીં પરંતુ જવાબદારીને પણ પ્રતિબિંબિત કરે છે.

એઆઇ અપનાવવા સ્પષ્ટ વ્યૂહરચના અને ટેક્નોલોજીની જરૂર : નાગેશ્વરન

મુખ્ય આર્થિક સલાહકાર વી. અનંત નાગેશ્વરને જણાવ્યું હતું કે, આર્ટિફિશિયલ ઇન્ટેલિજન્સ અપનાવવાનું આપમેળે થશે નહીં, તેના માટે સ્પષ્ટ વ્યૂહરચના અને ટેકનોલોજીને મોટા પાયે રોજગાર સાથે જાેડવાની પ્રતિબદ્ધતાની જરૂર છે. એઆઇ ઇમ્પેક્ટ સમિટ ૨૦૨૬માં તેમણે વર્ચ્યુઅલ સંબોધનમાં કહ્યું હતું કે, દેશોએ મજબૂત શિક્ષણ પ્રણાલીઓ, ઉચ્ચ-ગુણવત્તાવાળા કૌશલ્ય વિકાસ, શ્રમ-સઘન સેવા ક્ષેત્રોના વિસ્તરણ અને નિયમનકારી અવરોધોને દૂર કરવા પર ધ્યાન કેન્દ્રિત કરવા માટે નિર્ણાયક પગલાં લેવા જાેઈએ. એઆઈ અપનાવવું એક સહયોગી પ્રયાસ હોવો જાેઈએ, જેમાં ખાનગી ક્ષેત્ર, શિક્ષણવિદો અને નીતિ નિર્માતાઓની સંયુક્ત ભાગીદારીની જરૂર હોય. એઆઈ અપનાવવાની તક હજુ પણ ખુલ્લી છે, પરંતુ તે કાયમ માટે રહેશે નહીં, જેના માટે ઝડપી અને તાત્કાલિક પગલાં લેવાની જરૂર છે.

મેડિકલ ક્ષેત્રે એઆઇ આધારિત શિક્ષણની તૈયારી

એઆઇ ઇમ્પેક્ટ સમિટમાં, આરોગ્ય મંત્રાલયના ડેપ્યુટી ડિરેક્ટર જનરલ (મેડિકલ એજ્યુકેશન) બી. શ્રીનિવાસએ જણાવ્યું હતું કે, દૂરસ્થ મેડિકલ કોલેજાેને વિદ્યાર્થીઓને ઇ-પુસ્તકો, ડિજિટલ ક્લિનિકલ સામગ્રી અને તકનીકી અભ્યાસ સામગ્રી સુધી પહોંચવામાં નોંધપાત્ર મુશ્કેલીઓનો સામનો કરવો પડે છે. આવી સ્થિતિમાં, સરકાર એઆઇની મદદથી વિદ્યાર્થીઓને ગુણવત્તાયુક્ત શૈક્ષણિક સામગ્રી પ્રદાન કરવા માટે એક વ્યૂહરચના વિકસાવી રહી છે. નેશનલ મેડિકલ લાઇબ્રેરી દ્વારા ઇ-બુક્સ અને ડિજિટલ ક્લિનિકલ સામગ્રી પૂરી પાડવાની પ્રક્રિયા શરૂ કરવામાં આવી છે અને હાલમાં દેશભરની આશરે ૫૭ સરકારી મેડિકલ કોલેજમાં તેનો અમલ કરવામાં આવી રહ્યો છે.

મહેમાનો બેંક ખાતા કે ફોન નંબર વગર ચૂકવણી કરી શકશે

નવી દિલ્હીમાં યોજાનારી એઆઇ ઇમ્પેક્ટ સમિટ ૨૦૨૬ માં ભાગ લેનારા ૪૦ થી વધુ દેશોના પ્રતિનિધિઓ માટે એક મોટી સુવિધા રજૂ કરાઈ છે. નેશનલ પેમેન્ટ્સ કોર્પોરેશન ઓફ ઇન્ડિયા (એનપીસીઆઇ)એ એઆઇ ઇમ્પેક્ટ સમિટમાં ભાગ લેવા માટે ભારતના મુલાકાતીઓ માટે યુપીઆઇ વન વર્લ્ડ વોલેટ સેવા શરૂ કરી છે. આ સેવા વિદેશી મહેમાનોને ભારતમાં યુપીઆઇ ચુકવણી કરવાની મંજૂરી આપશે. તેમને ભારતીય મોબાઇલ નંબર અથવા બેંક એકાઉન્ટની જરૂર રહેશે નહીં. એનપીસીઆઇએ એક નિવેદનમાં જણાવ્યું હતું કે, આ પહેલ વિદેશી પ્રવાસીઓને ભારતમાં મુસાફરી કરતી વખતે સુરક્ષિત અને સરળ યુપીઆઇ ચુકવણીઓ કરવા સક્ષમ બનાવશે. તેઓ ભારતની સંસ્કૃતિ, ખોરાક અને બજારોનો આનંદ માણતી વખતે મેડ ઇન ઇન્ડિયા ટેકનોલોજીનો ઉપયોગ કરી શકશે.

ટેકનોલોજીના ઉપયોગથી નોકરી જતી નથી : બિખચંદાની

ઇન્ફો એજના સહ-સ્થાપક સંજીવ બિખચંદાનીએ જણાવ્યું હતું કે, રાજીવ ગાંધીની સરકાર દરમિયાન બેંકોમાં કમ્પ્યુટરનો ઉપયોગ કરવામાં આવશે ત્યારે એવું કહેવામાં આવતું હતું કે, આનાથી નોકરી ગુમાવશે, પરંતુ કોઈએ નોકરી ગુમાવી નથી. ટેકનોલોજીના ઉપયોગથી નોકરી ગુમાવવાનો ભય હંમેશા રહે છે, પરંતુ તે થતું નથી.

ભારતમાં એઆઇના મહાકુંભનું આયોજન : જિતિન પ્રસાદ

કેન્દ્રીય ઇલેક્ટ્રોનિક્સ અને આઇટી રાજ્યમંત્રી જિતિન પ્રસાદે જણાવ્યું હતું કે, ભારત એઆઈના મહાકુંભનું આયોજન કરી રહ્યું છે, જ્યાં પાંચ દિવસીય એઆઈ ઇમ્પેક્ટ સમિટ માટે વિશ્વભરના નેતાઓ, સ્ટાર્ટઅપ્સ, ઇનોવેટર્સ અને સંશોધકો એકઠા થયા છે. તેમણે કહ્યું કે માત્ર ભારત જ નહીં પરંતુ સમગ્ર વિશ્વ આ સમિટના પરિણામ પર નજર રાખી રહ્યું છે, અને આ કાર્યક્રમ ભારતની વૈશ્વિક ટેકનોલોજીકલ ભૂમિકા માટે એક ઐતિહાસિક સિદ્ધિ છે. પ્રસાદના મતે, આ આંતરરાષ્ટ્રીય સમિટમાં રાજ્યના વડાઓ, ટેક નેતાઓ અને ઉદ્યોગ પ્રતિનિધિઓ હાજરી આપશે.