ન્યૂ દિલ્હી

ટાટા મોટર્સે ઉત્પાદન ખર્ચમાં વધારાને કારણે તેના પેસેન્જર વાહનોના ભાવમાં વધારો કરવાની યોજના બનાવી છે. જોકે કંપની તે જણાવ્યું ન હતું કે તે મુસાફરી વાહનોના ભાવમાં ક્યારે વધારો કરશે, પરંતુ કહ્યું છે કે તે જલ્દીથી આ પગલું ભરશે.

ટાટા મોટર્સે એક નિવેદનમાં જણાવ્યું હતું કે કંપની ટૂંક સમયમાં તેની કાર અને એસયુવીની રેન્જના ભાવમાં નોંધપાત્ર વધારો કરશે. કંપનીએ જણાવ્યું હતું કે કુલ ઉત્પાદન ખર્ચમાં ખાસ કરીને સ્ટીલ અને કિંમતી ધાતુઓ સહિતના આવશ્યક કાચા માલની કિંમતમાં મોટો વધારો થવાને કારણે તેણે ગ્રાહકો પરનો થોડો બોજો પસાર કરવો પડશે.

કંપનીએ કહ્યું કે, ભાવવધારાની ઔપચારિક જાહેરાત આવતા દિવસો, અઠવાડિયામાં કરવામાં આવશે. ટાટા મોટર્સ સ્થાનિક બજારમાં ટિયાગો, નેક્સન અને હેરિયર જેવા મોડેલો વેચે છે. આ પહેલા રવિવારે હોન્ડા કાર્સે તેની ઓગસ્ટથી મોડેલની સંપૂર્ણ શ્રેણી માટે કિંમતમાં વધારાની જાહેરાત કરી હતી.

 છેલ્લા કેટલાક મહિનાઓમાં દેશમાં સ્ટીલની કિંમતમાં મોટો વધારો થયો છે. જૂનમાં સ્ટીલના ઉત્પાદકોએ હોટ રોલ્ડ કોઇલ (એચઆરસી) અને કોલ્ડ રોલ્ડ કોઇલ (સીઆરસી) ના ભાવમાં અનુક્રમે રૂ. ૪,૦૦૦ અને રૂ. ૪,૯૦૦ નો વધારો કર્યો હતો.

એચઆરસી અને સીઆરસી એ ફ્લેટ સ્ટીલ ઉત્પાદનો છે જેનો ઉપયોગ વાહનો, ઉપકરણો અને બાંધકામ ક્ષેત્રોમાં થાય છે. આવી સ્થિતિમાં સ્ટીલના ભાવોમાં વધારો થવાને કારણે વાહનો, ગ્રાહક માલના ભાવમાં વધારો થાય છે. આ ઉપરાંત બાંધકામની કિંમત પણ વધે છે.