મુંબઈ :મધ્ય-પૂર્વમાં યુદ્ધની અસર ફરી શેરબજાર પર જાેવા મળી છે. આજે સપ્તાહના ચોથા દિવસે શેરબજારમાં ૨૨ મહિનામાં સૌથી મોટો ઘટાડો જાેવા મળ્યો હતો. સેન્સેક્સ ૭૪,૨૦૭ પર બંધ થયો હતો, જેમાં ૨,૪૯૭ પોઈન્ટ (૩.૨૬%)નો ઘટાડો થયો હતો. તેવી જ રીતે, નિફ્ટીમાં પણ ૭૭૬ પોઈન્ટ (૩.૨૬%)નો ઘટાડો નોંધાયો હતો, જે ૨૩,૦૦૨ પોઈન્ટથી નીચે આવી ગયો હતો, જેના કારણે એક જ દિવસમાં રોકાણકારોના અંદાજે ૧૨ લાખ કરોડ રૂપિયા ડૂબી ગયા છે. આ પહેલા, ૪ જૂન, ૨૦૨૪ના રોજ સેન્સેક્સ ૫.૭૪% ઘટ્યો હતો. આજે બેંકિંગ અને ઓટો શેરોમાં સૌથી મોટો ઘટાડો જાેવા મળ્યો. ભૂરાજકીય તણાવ અને યુદ્ધ જેવી પરિસ્થિતિઓમાં ફુગાવો વધવાનું જાેખમ રહેલું છે. આનાથી કોર્પોરેટ નફામાં ઘટાડો થઈ શકે છે. પરિણામે, રોકાણકારો તેમના શેર વેચવાનું શરૂ કરે છે અને તેમની મૂડીને સુરક્ષિત રોકાણના સ્થળોએ ફરીથી ફાળવવાનું શરૂ કરે છે, જેના પરિણામે બજારમાં ઘટાડો થાય છે.

સેન્સેક્સ ગઈકાલે ૭૪,૭૫૦.૯૨ પોઈન્ટ પર બંધ થયા બાદ આજે ૭૪,૭૫૦.૯૨ પોઈન્ટ પર ખુલ્યું હતું. ટ્રેડિંગ દરમિયાન સૌથી ઊંચા મથાળે ૭૫,૩૫૪.૧૮ પોઈન્ટ પર સ્પર્શ્યા બાદ નીચેમાં ૭૩,૯૫૦.૯૫ પોઈન્ટ પર પહોંચ્યું હતું, છેવટે દિવસના અંતે ૩.૨૬ ટકાના ઘટાડા સાથે ૭૪,૨૦૭.૨૪ પોઈન્ટ પર બંધ થયું હતું. એટલે કે આજે સેન્સેક્સમાં ૨,૪૯૬.૮૯ પોઈન્ટનો ઘટાડો થયો છે.

નિફ્ટી ૫૦ની વાત કરીએ તો આજે તેમાં ૩.૨૬ ટકાનો ઘટાડો નોંધાયો છે. ગઈકાલે ૨૩,૭૭૭.૮૦ પોઈન્ટ પર બંધ થયા બાદ આજે ૨૩,૧૯૭.૭૫ પોઈન્ટ પર ખુલ્યું હતું. આજે ટ્રેડિંગ દરમિયાન નિફ્ટી ૫૦ ઊંચા મથાળે ૨૩,૩૭૮.૭૦ પોઈન્ટ પર સ્પર્શ્યું હતું અને નીચામાં ૨૨,૯૩૦.૩૫ પોઈન્ટ પર પહોંચ્યું હતું. છેવટે દિવસના અંતેર નિફ્ટી ૫૦ ૨૩,૦૦૨.૧૫ પર બંધ થયું છે. એટલે કે આજે નિફ્ટી ૫૦માં ૭૭૫.૬૫ ટકાનો ઘટાડો નોંધાયો છે.

નિફ્ટી બેંક આજે ૩.૩૯ ટકા એટલે કે ૧,૮૭૫.૦૫ના મોટા ઘટાડા સાથે ૫૩,૪૫૧ પોઈન્ટ પર બંધ છે. નિફ્ટી બેંક ગઈકાલે ૫૫,૩૨૬.૦૫ પોઈન્ટ પર બંધ થયા બાદ આજે ૫૩,૪૭૪.૫૫ ખુલ્યું હતું. દિવસ દરમિયાન ઊંચામાં ૫૪,૧૫૦.૩૦ પોઈન્ટ અને નીચામાં ૫૩,૨૪૦.૬૦ પોઈન્ટ નોંધાયું હતું. એટલે કે તેમાં ૧૮૭૫.૦૫ પોઈન્ટનો મોટો કડાકો નોંધાયો છે. આ ઉપરાંત નિફ્ટી આઈટીમાં ૩.૩૧ ટકા એટલે કે ૯૭૯.૭૦ પોઈન્ટનો કડાકો નોંધાયો છે અને આજે તે ૨૮,૫૭૯.૬૦ પોઈન્ટ પર બંધ થયું છે. જ્યારે નિફ્ટી ઓટોમાં ૪.૨૫ ટકા એટલે કે ૧,૦૮૮.૯૫ પોઈન્ટનો કડાકો નોંધાયો છે અને તે ૨૪,૫૦૯.૯૦ પોઈન્ટ પર બંધ થયું છે.

પશ્ચિમ એશિયામાં ચાલી રહેલા તણાવ વચ્ચે ગુરુવારે સોના અને ચાંદીના ભાવ ઘટ્યા. ચાંદીના ભાવ રૂ.૧૪,૨૩૦ ઘટીને રૂ.૨.૩૩ લાખ પ્રતિ કિલો થયા, જ્યારે સોનાના ભાવ રૂ.૫,૩૩૦ ઘટીને રૂ.૧.૪૮ લાખ પ્રતિ ૧૦ ગ્રામ થયા. આ દરમિયાન, યુએસ ફેડરલ રિઝર્વે વ્યાજ દર સ્થિર રાખ્યા છે. ફેડના અધ્યક્ષ જેરોમ પોવેલે તેમની પ્રેસ કોન્ફરન્સ દરમિયાન ઘણી વખત અનિશ્ચિતતા શબ્દનો ઉલ્લેખ કર્યો હતો, અને સૂચવ્યું હતું કે ટેરિફ અને ઊર્જા કટોકટી ફુગાવાના દબાણમાં વધારો કરી શકે છે. તેમનું વલણ પ્રમાણમાં કટ્ટરપંથી માનવામાં આવે છે. આંતરરાષ્ટ્રીય બજારમાં ક્રૂડ ઓઈલના ભાવમાં ભડકો જાેવા મળી રહ્યો છે. મિડલ ઈસ્ટમાં ચાલી રહેલ યુદ્ધ હવે એક મોટા તેલ યુદ્ધમાં ફેરવાઈ રહ્યું છે. ખાડી દેશોમાં તેલ અને ગેસ ક્ષેત્રો પર ધનાધન મિસાઈલ હુમલાઓને કારણે આંતરરાષ્ટ્રીય બજારમાં ક્રૂડ ઓઈલના ભાવમાં વધારો થયો છે, જેમાં બ્રેન્ટ ક્રૂડના ભાવ અચાનક ૧૧૩  ડોલર પ્રતિ બેરલ પર પહોંચી ગયા છે. આનાથી એશિયન શેરબજારોમાં હાહાકાર મચ્યો છે, અને ભારતીય શેરબજાર ખુલતાની સાથે જ ધડામ થઈને તૂટી પડ્યું.