શહેરના ગોપીપુરા વિસ્તારમાં ડ્રગ્સનો વેપલો કરતાં યુવકને ક્રાઇમ બ્રાન્ચે દબોચી લીધો હતો. ૬.૪૪ લાખ કિંમતની ૨૧૫ ગ્રામ મેફેડ્રોન ડ્રગ્સ કબજે લઇ પોલીસે વેચાણ કરનાર શાહપોરનાં પેડલરને વોન્ટેડ જાહેર કર્યો છે. ક્રાઇમ બ્રાન્ચનાં સૂત્રો પાસે મળતી માહિતી અનુસાર સબ ઇન્સ્પેકટર કિર્તીપાલસિંહ પુવારને એવી બાતમી મળી હતી કે, ગોપીપુરામાં મોમનાવાડ સ્થિત જલારામ એપાર્ટમેન્ટમાં બીજા માળે રહેતો ઝૂબેર નામનો યુવક એમડી ડ્રગ્સનું છૂટકમાં વેચાણ કરી રહ્યો છે. ખાનગી રાહે બાતમી અંગે તપાસ કરાવ્યા બાદ ત્યાં દરોડો પાડવામાં આવ્યો હતો. મોમનાવાડ, સીદી બાગદશાહનાં ટેકરા પર આવેલા જલારામે એપાર્ટમેન્ટનાં ૨૦૧ નંબરનાં ફ્લેટમાંથી મોહમંદ ઝુબેર ગુલામરસુલ શાહ મળી આવ્યો હતો. મૂળ રૂદરપુરા, બોમ્બે કોલોનીનો રહેવાસી ઝૂબેરની અંગજડતી દરમિયાન પેન્ટના ખિસ્સામાંથી પાઉન્ડ સ્વરૂપનો માદક પદાર્થ ભરેલી પારદર્શક ઝીપ લોક વાળું પાઉચ મળી આવ્યું હતું. આ ઉપરાંત એક નાનો ડિજિટલ વજન કાંટો અને બે મોબાઇલ ફોન પણ મળ્યા હતાં. પાઉચમાંથી મળેલા પાઉડરનું વજન ૨૧૪.૭૩૦ ગ્રામ થયું હતું. આ પાઉડરની તપાસ માટે એફએસએલ બોલાવાઈ હતી. એફએસએલની ટીમે પોર્ટેબલ કીટ થકી સ્થળ પર કરેલી પરિક્ષણમાં એ પાઉડર મેફેડ્રોન ડ્રગ્સ હોવાનું બહાર આવ્યું હતું. જેથી ૨૧૪.૭૩૦ ગ્રામ એમડી ડ્રગ્સની કિંમત ૬,૪૪,૧૯૦ રૂપિયા આંકવામાં આવી હતી. ડ્રગ્સ, વજનકાંટો, મોબાઇલ ફોન વિગેરે મળી ૬,૫૯,૨૯૦ કિંમતની મતા કબજે લઇ ઝૂબેરની પૂછપરછ કરાઈ હતી. જેમાં તેણે આ ફ્લેટમાં બે મહિનાથી રહેવા આવ્યો હોવાનું જણાવ્યું હતું. સાથે ડ્રગ્સનો જથ્થો સુરત શાહપોર વિસ્તારમાં રહેતાં એજાઝ ઉર્ફે બાટલા મુસ્તાક ડાયર પાસેથી ખરીદી લાવ્યો હોવાની કબૂલાત પણ કરી હતી. પોલીસે ઝૂબેરની ધરપકડ કરી એજાઝને વોન્ટેડ જાહેર કર્યો છે.