પાકિસ્તાનના બન્નુ જિલ્લામાં શનિવારે મોડી રાત્રે એક જીવલેણ આત્મઘાતી હુમલો થયો. એક આત્મઘાતી હુમલાખોરે પોતાનું વિસ્ફોટકોથી ભરેલું વાહન ફતેહ ખેલ પોલીસ ચોકી પર અથડાવ્યું. આ શક્તિશાળી વિસ્ફોટમાં ૧૫ પોલીસ કર્મચારીઓના મોત અને ત્રણ અન્ય ઘાયલ થયા છે.

અધિકારીઓએ આ ઘટનાની પુષ્ટિ કરી છે.વિસ્ફોટ એટલો શક્તિશાળી હતો કે પોલીસ ચોકી સંપૂર્ણપણે કાટમાળમાં ફેરવાઈ ગઈ. બન્નુના ડીઆઈજી સજ્જાદ ખાને જણાવ્યું હતું કે વિસ્ફોટથી ભારે વિનાશ થયો અને ઘણા અધિકારીઓ કાટમાળ નીચે દટાઈ ગયા. બચાવ ટીમોએ રાતોરાત કામગીરી બાદ કાટમાળમાંથી ત્રણ પોલીસ અધિકારીઓને સુરક્ષિત રીતે બહાર કાઢ્યા. ઘાયલોને તાત્કાલિક જિલ્લા મુખ્યાલયની હોસ્પિટલમાં દાખલ કરવામાં આવ્યા હતા, અધિકારીઓએ મૃતક અધિકારીઓની ઓળખ કરી છે. તેમના નામ રહેમત અયાઝ, સનાઉલ્લાહ, નિયાઝ અલી, હબીબ, સદુલ્લાહ જાન, કામરાન (ખાન સિકંદરનો પુત્ર), અન્ય કામરાન, નૂરઉલ્લાહ, આબિદ જાની, ઇમરાન, કલીમુલ્લાહ, સાદિકુલ્લાહ, મુનીર આલમ ખાન, રહતુલ્લાહ ખાન અને ફારૂક છે. ઘાયલ સૈનિકોની ઓળખ મુજરિમ ફિરોઝ, હયાતુલ્લાહ અને કદરુલ્લાહ તરીકે થઈ છે.