હિંડનબર્ગ રિસર્ચના રિપોર્ટ બાદ ચર્ચામાં આવેલા અદાણી ગ્રુપને સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI) તરફથી ક્લીન ચીટ મળી છે. SEBIએ તેના અંતિમ આદેશમાં સ્પષ્ટ કર્યું છે કે અદાણી ગ્રુપ સામેના તમામ આરોપો સાબિત થઈ શક્યા નથી, અને તેથી કોઈ દંડ લાદવામાં આવ્યો નથી. આ નિર્ણય બાદ ભાજપના નેતા શહજાદ પૂનાવાલા અને ગ્રુપના ચેરમેન ગૌતમ અદાણીએ આને 'સત્યનો વિજય' ગણાવ્યો છે અને ખોટા આરોપો લગાવનારાઓ પાસેથી માફીની માંગ કરી છે.

સેબીના રિપોર્ટ બાદ ભાજપના પ્રવક્તા શહજાદ પૂનાવાલાએ કહ્યું, "આજે, સત્યનો ફરી એકવાર વિજય થયો છે. સુપ્રીમ કોર્ટે પણ અગાઉ આ આરોપોને પાયાવિહોણા ગણાવ્યા હતા." તેમણે કોંગ્રેસ પર સંસદને બંધક બનાવવાનો, આર્થિક અરાજકતા ઊભી કરવાનો અને ભારતીય રોકાણકારોને નુકસાન પહોંચાડવાનો આરોપ લગાવ્યો. પૂનાવાલાએ પ્રશ્ન કર્યો કે શું કોંગ્રેસના નેતાઓ હવે માફી માંગશે.

બીજી તરફ, ગૌતમ અદાણીએ સોશિયલ મીડિયા પ્લેટફોર્મ 'X' પર પોસ્ટ કરીને કહ્યું, "ખોટી માહિતી ફેલાવનારાઓએ રાષ્ટ્રની માફી માંગવી જોઈએ." તેમણે ભારપૂર્વક જણાવ્યું કે સેબીના આદેશોએ ફરી એકવાર સાબિત કર્યું છે કે હિંડનબર્ગના દાવા સંપૂર્ણપણે પાયાવિહોણા હતા અને પારદર્શિતા તથા પ્રામાણિકતા હંમેશા અદાણી ગ્રુપની ઓળખ રહી છે.

સેબીએ ગુરુવારે બે અલગ અલગ આદેશોમાં સ્પષ્ટતા કરી કે હિંડનબર્ગ રિસર્ચ દ્વારા ઉઠાવવામાં આવેલા મુદ્દાઓ પર થયેલી તપાસમાં અદાણી ગ્રુપની કંપનીઓ અને તેના વરિષ્ઠ અધિકારીઓ સામે કોઈ પુરાવા મળ્યા નથી. આ નિર્ણય બાદ અદાણી ગ્રુપની કંપનીઓ સામેની તમામ કાર્યવાહી બંધ કરી દેવામાં આવી છે. આ નિર્ણય અદાણી ગ્રુપ માટે એક મોટી જીત અને તેની પ્રતિષ્ઠાને પુનઃસ્થાપિત કરવા માટે એક મહત્વપૂર્ણ પગલું છે.