જૂનાગઢના માંગરોળમાં એક જર્જરિત મકાન ધરાશાયી થતા તેના કાટમાળ નીચે દટાયેલા દાદા અને પૌત્રનું મોત થયુ હતુ. આ દુર્ઘટનાને પગલે વિસ્તારમાં ગમગીની છવાઈ હતી. ઘટના સંદર્ભે સ્થાનિક પોલીસે અકસ્માત મોત નોંધી તપાસ શરૂ કરી છે. 

આ દુર્ઘટના માંગરોળના ચા બજાર વિસ્તારમાં બની હતી. એક જર્જરિત અને જૂનું મકાન અચાનક ધસી પડ્યું હતું. તે જ સમયે એક દાદા તેમના પૌત્ર સાથે બાઇક પર ત્યાંથી પસાર થઈ રહ્યા હતા. આ દરમિયાન મકાનનો કાટમાળ સીધો તેમના પર પડ્યો હતો, જેના કારણે બંને ગંભીર રીતે ઇજાગ્રસ્ત થયા અને ઘટનાસ્થળે જ તેમનું કરુણ મોત થયું હતું.

આ ઘટનાની જાણ થતાં જ સ્થાનિક લોકો અને પોલીસ ઘટનાસ્થળે દોડી આવ્યા હતા. કાટમાળ હટાવવાની કામગીરી તાત્કાલિક શરૂ કરવામાં આવી હતી. આ ઘટનાથી સમગ્ર વિસ્તારમાં ગમગીની છવાઈ ગઈ છે. આવા જર્જરિત મકાનો સામે તંત્ર દ્વારા કડક કાર્યવાહી કરવામાં આવે તેવી માંગણી પણ સ્થાનિક લોકો કરી રહ્યા છે.