GST વિભાગે કરી ટેક્સ, વ્યાજ, દંડ સાથે ૪૦ કરોડની માગ

દેશની જાણીતી ફૂડ ડિલિવરી અને ક્વિક-કોમર્સ કંપનીઓ ઝોમેટો અને બ્લિંકિટની પેરેન્ટ કંપની એટરનલ (Eternal) ને જીએસટી વિભાગ તરફથી મોટો આંચકો લાગ્યો છે. જીએસટી વિભાગે કંપની પર ટેક્સ, વ્યાજ અને દંડ સહિત કુલ ૪૦.૩૩ કરોડ રૂપિયાથી વધુની ટેક્સ માંગણી કરી છે. આ માંગણી જુલાઈ ૨૦૧૭ થી માર્ચ ૨૦૨૦ના સમયગાળા માટે છે. કંપનીએ આ આદેશો સામે અપીલ દાખલ કરવાની જાહેરાત કરી છે.

એટરનલ કંપનીને બેંગલુરુના જોઈન્ટ કમિશનર અપીલ-૪ દ્વારા ૨૫ ઓગસ્ટ ૨૦૨૫ના રોજ ત્રણ અલગ-અલગ નોટિસ મોકલવામાં આવી છે. આ નોટિસોમાં જે રકમની માંગણી કરવામાં આવી છે તેની વિગત મુજબ જીએસટી ટેક્સ ₹૧૭.૧૯ કરોડ, વ્યાજ ₹૨૧.૪૨ કરોડ અને દંડ ₹૧.૭૧ કરોડ માંગણી કરાઈ છે.

આ તમામ રકમ મળીને કુલ માંગણી ₹૪૦.૩૩ કરોડથી વધુ થાય છે. આ ટેક્સ માંગણી કંપની માટે નાણાકીય દબાણનું કારણ બની શકે છે.

જીએસટી વિભાગના આદેશો બાદ એટરનલ કંપનીએ નિવેદન બહાર પાડીને જણાવ્યું છે કે કંપની પાસે આ ટેક્સ માંગણી સામે મજબૂત કાનૂની આધાર છે. કંપનીના વકીલોએ પણ આ વાતનું સમર્થન કર્યું છે. તેથી, એટરનલ ટૂંક સમયમાં જ આ ટેક્સ માંગણી અને દંડ સામે કાયદેસર અપીલ દાખલ કરશે. કંપનીનું માનવું છે કે અપીલમાં તેમને રાહત મળવાની શક્યતા છે.

એટરનલ એ એક હોલ્ડિંગ કંપની છે જે ચાર મોટા વ્યવસાયોનું સંચાલન કરે છે: ઝોમેટો, બ્લિંકિટ, ડિસ્ટ્રિક્ટ અને હાઇપરપ્યુર. આ બ્રાન્ડ્સ ભારતમાં અને આંતરરાષ્ટ્રીય સ્તરે એક મોટો વ્યવસાય ચલાવી રહી છે. આ કેસનું પરિણામ શું આવે છે તે હવે જોવું રસપ્રદ રહેશે, કારણ કે તે અન્ય કંપનીઓ માટે પણ એક મહત્વપૂર્ણ કાનૂની દૃષ્ટાંત બની શકે છે.