અમદાવાદના મીઠાખળી વિસ્તારમાં અસામાજિક તત્વોની બેફામ હરકત સામે આવતા સ્થાનિકોમાં ભયનો માહોલ સર્જાયો છે. કાર એસેસરીઝની દુકાન નજીક બનેલી આ ઘટનામાં ચાર શખ્સો રિક્ષામાં તલવાર લઈને પહોંચ્યા હતા અને એક યુવકને ખુલ્લેઆમ ધમકી આપતા વિસ્તારના લોકોમાં ગભરાટ ફેલાયો હતો. મળતી માહિતી મુજબ, મીઠાખળી વિસ્તારમાં આવેલી પ્રમુખ મોટર્સ નામની સંસ્થામાં નોકરી કરતા એક યુવકને નિશાન બનાવી આ ઘટના અંજામ આપવામાં આવી હતી. ચારેય શખ્સો રિક્ષામાં સવાર થઈ સ્થળ પર પહોંચ્યા હતા અને હાથમાં તલવાર જેવા ઘાતક હથિયારો લઈને કર્મચારીને ધમકાવવાનો પ્રયાસ કર્યો હતો. જાહેર માર્ગ પર બનેલી આ ઘટનાને કારણે આસપાસના વેપારીઓ અને રાહદારીઓમાં ભયનો માહોલ સર્જાયો હતો.પ્રાથમિક તપાસમાં સામે આવ્યું છે કે આ સમગ્ર મામલો અંગત અદાવત સાથે જાેડાયેલો હોઈ શકે છે. અગાઉના કોઈ વિવાદ કે વ્યક્તિગત મતભેદના કારણે કર્મચારીને નિશાન બનાવવામાં આવ્યો હોવાનું માનવામાં આવી રહ્યું છે.

જાેકે ઘટનાનું ચોક્કસ કારણ જાણવા પોલીસ દ્વારા તપાસ હાથ ધરવામાં આવી છે. સ્થાનિક લોકોના જણાવ્યા અનુસાર, આરોપીઓ સામે અગાઉ પણ વિવિધ પ્રકારના ગુનાઓ નોંધાયેલા હોવાની ચર્ચા ચાલી રહી છે. જેના કારણે વિસ્તારના રહેવાસીઓ અને વેપારીઓએ પોલીસ સમક્ષ કડક કાર્યવાહી કરવાની માગ ઉઠાવી છે. લોકોનું કહેવું છે કે જાહેરમાં હથિયારો સાથે આવીને ધમકી આપવાની ઘટના કાયદો અને વ્યવસ્થાની સ્થિતિ અંગે ગંભીર પ્રશ્નો ઉભા કરે છે.ઘટનાની જાણ થતાં પોલીસ પણ હરકતમાં આવી છે અને આસપાસના સીસીટીવી ફૂટેજના આધારે આરોપીઓની ઓળખ અને તેમની હિલચાલ અંગે તપાસ શરૂ કરી છે. પોલીસે જણાવ્યું છે કે ફરિયાદ અને પુરાવાના આધારે કાયદેસરની કાર્યવાહી કરવામાં આવશે. આ ઘટનાએ ફરી એકવાર શહેરમાં અસામાજિક તત્વોની વધતી દાદાગીરી અને જાહેર સુરક્ષા અંગે ચિંતા ઊભી કરી છે. સ્થાનિકોએ આવા તત્વો સામે ઝડપી અને કડક કાર્યવાહી કરવાની માગ કરી છે.