ગુજરાતમાં છેલ્લા ત્રણ દાયકાથી વધુ સમયથી અંધશ્રદ્ધા સામે જનજાગૃતિ ફેલાવતી ભારત જન વિજ્ઞાન જાથા હવે પોતાની પ્રવૃત્તિઓ બંધ કરવા જઈ રહી છે. સંસ્થાના સ્થાપક જયંત પંડ્યાએ વધતી ઉંમર, સતત મળતી ધમકીઓ, શારીરિક જોખમ અને પરિવારની શાંતિને ધ્યાનમાં રાખીને આ નિર્ણય લીધો હોવાનું જણાવ્યું છે.

જયંત પંડ્યાના આ નિર્ણયથી રેશનાલિસ્ટ અને વૈજ્ઞાનિક વર્તુળોમાં ચિંતા વ્યક્ત થઈ રહી છે. જોકે તેમણે સ્પષ્ટ કર્યું છે કે મેદાનમાં કામગીરી ભલે બંધ થશે, પરંતુ વૈજ્ઞાનિક અભિગમ અને લોકજાગૃતિ માટેનું વૈચારિક કાર્ય તેઓ આગળ પણ ચાલુ રાખશે.