જાણો SBI, HDFC બેંકની મર્યાદા અને અન્ય નિયમો

આજકાલ યુનિફાઇડ પેમેન્ટ્સ ઇન્ટરફેસ (UPI) એ નાણાકીય વ્યવહારોને અત્યંત સરળ બનાવી દીધા છે. મોબાઇલ ફોનના થોડા ટેપથી જ તમે કોઈને પણ તાત્કાલિક પૈસા મોકલી શકો છો. પરંતુ શું તમે જાણો છો કે UPI દ્વારા એક દિવસમાં કેટલી વાર અને કેટલી મહત્તમ રકમ મોકલી શકાય છે? આ જાણવું તમારા માટે ખૂબ જ જરૂરી છે, કારણ કે આનાથી ટ્રાન્ઝેક્શન નિષ્ફળતાની સમસ્યાથી બચી શકાય છે.

UPIની દૈનિક વ્યવહાર મર્યાદા

સામાન્ય રીતે, UPI માં એક દિવસમાં મહત્તમ રૂ. ૧ લાખ સુધીનો વ્યવહાર કરી શકાય છે. આ મર્યાદા વ્યક્તિથી વ્યક્તિ (P2P) અને વ્યક્તિથી વેપારી (P2M) બંને માટે લાગુ પડે છે. જોકે, કેટલીક બેંકોએ વ્યવહારોની સંખ્યા પર પણ મર્યાદા લાદી છે. ઉદાહરણ તરીકે, સ્ટેટ બેંક ઓફ ઇન્ડિયા (SBI) અને HDFC બેંક માં એક ખાતામાંથી ૨૪ કલાકમાં મહત્તમ ૨૦ P2P વ્યવહારો કરી શકાય છે, જેની મહત્તમ રકમ ૧ લાખ રૂપિયા છે. નવા વપરાશકર્તાઓ માટે, HDFC બેંકમાં પ્રથમ ૨૪ કલાક માટે રૂ. ૫,૦૦૦ ની મર્યાદા હોય છે.

આ કિસ્સાઓમાં મર્યાદા વધુ છે

• રૂ. ૫ લાખ સુધી: કર ચૂકવણી, IPO અરજી, RBI ની રિટેલ ડાયરેક્ટ સ્કીમ અથવા ચકાસાયેલ હોસ્પિટલ અને શૈક્ષણિક સંસ્થાઓમાં ચુકવણી માટે.

• રૂ. ૨ લાખ સુધી: મૂડી બજાર, ક્રેડિટ કાર્ડ ચૂકવણી, લોન ચૂકવણી, વિદેશી વ્યવહારો અને વીમા સંબંધિત ચૂકવણી માટે.

UPIના અન્ય સંસ્કરણો માટે મર્યાદા

• UPI Lite: આ સુવિધાનો ઉપયોગ નાની અને રોજિંદી ચૂકવણી માટે થાય છે. આમાં એક સમયે મહત્તમ રૂ. ૧,૦૦૦ નો વ્યવહાર કરી શકાય છે અને વોલેટમાં એક દિવસમાં વધુમાં વધુ રૂ. ૪,૦૦૦ ઉમેરી શકાય છે. વોલેટમાં ગમે ત્યારે મહત્તમ રૂ. ૫,૦૦૦ રાખી શકાય છે.

• UPI123પે: ફીચર ફોન અથવા ઇન્ટરનેટ વિનાના લોકો માટે આ સુવિધા ઉપલબ્ધ છે. આ દ્વારા એક સમયે મહત્તમ રૂ. ૧૦,૦૦૦ નો વ્યવહાર કરી શકાય છે.

રોજિંદા જીવનમાં UPI નો ઉપયોગ કરતા લોકો માટે આ મર્યાદાઓ વિશે જાણકારી રાખવી અત્યંત આવશ્યક છે, જેથી કોઈપણ મોટી ચુકવણી કરતી વખતે અસુવિધા ન થાય.