નાગરિક ઉડ્ડયન મંત્રાલયની પ્રેસ કોન્ફરન્સ : ઘટના સદર્ભે આપી તમામ માહિતી

અમદાવાદ વિમાન દુર્ઘટના પર નાગરિક ઉડ્ડયન મંત્રાલયે આજે એક પ્રેસ કોન્ફરન્સ યોજી હતી. આ દરમિયાન દુર્ઘટના અંગેની કેટલીક મહત્ત્વપૂર્ણ વિગતો જાહેર કરવામાં આવી હતી.

નાગરિક ઉડ્ડયન મંત્રી રામ મોહન નાયડુએ જણાવ્યું હતું કે, "૬૫૦ ફૂટની ઊંચાઈએ વિમાન ખરાબ થયું હતું. પાઇલટે ઇમરજન્સી કોલ આપ્યો હતો." આ અકસ્માત બપોરે ૧:૪૦ વાગ્યે થયો હતો. તેમણે વધુમાં જણાવ્યું કે વિમાન એરપોર્ટથી બે કિલોમીટરના અંતરે ક્રેશ થયું હતું. મંત્રાલયને અકસ્માતની માહિતી બપોરે ૨ વાગ્યે મળી હતી, જ્યારે સાંજે ૬ વાગ્યે આગ પર કાબુ મેળવી લેવામાં આવ્યો હતો.

મંત્રી રામ મોહન નાયડુએ માહિતી આપી કે, આ અકસ્માતની તપાસ માટે એક ઉચ્ચ સ્તરીય સમિતિની રચના કરવામાં આવી છે. અકસ્માત સ્થળ પરથી ગઈકાલે (શુક્રવારે, ૧૩ જૂન, ૨૦૨૫) સાંજે ૫ વાગ્યે બ્લેક બોક્સ મળી આવ્યું હતું, જેની તપાસ હજુ બાકી છે. તેમણે સ્પષ્ટ કર્યું કે અકસ્માતનું કારણ શોધવામાં થોડો સમય લાગી શકે છે.

નાગરિક ઉડ્ડયન મંત્રાલયના સચિવ સમીર કુમાર સિંહાએ વિગતો આપતા જણાવ્યું હતું કે, "વિમાન બપોરે ૧:૩૯ વાગ્યે ઉડાન ભરી હતી. લગભગ ૬૫૦ ફૂટની ઊંચાઈએ પહોંચ્યા પછી, તેની ઊંચાઈ ઘટવા લાગી. પાઇલટે બપોરે ૧:૩૯ વાગ્યે ATC (એર ટ્રાફિક કંટ્રોલ) ને સંપૂર્ણ કટોકટીની જાણ કરી. ATC ના જણાવ્યા અનુસાર, જ્યારે તેણે વિમાનનો સંપર્ક કરવાનો પ્રયાસ કર્યો, ત્યારે તેને કોઈ પ્રતિસાદ મળ્યો નહીં. ૧ મિનિટ પછી, વિમાન એરપોર્ટથી ૨ કિમી દૂર મેઘાણી નગર ખાતે ક્રેશ થયું."

તેમણે ઉમેર્યું કે, આ અકસ્માત પહેલા, વિમાને પેરિસથી દિલ્હી અને દિલ્હીથી અમદાવાદની ફ્લાઇટ કોઈપણ ઘટના વિના પૂર્ણ કરી હતી. અકસ્માતને કારણે, એરપોર્ટ બપોરે ૨:૩૦ વાગ્યે બંધ કરવામાં આવ્યું હતું. બધા પ્રોટોકોલ પૂર્ણ કર્યા પછી તેને સાંજે ૫ વાગ્યે ખોલવામાં આવ્યું હતું.