ચીનના કિંઘાઈ પ્રાંતમાં મંગળવારે એક શક્તિશાળી ભૂકંપ આવ્યો હતો. રિક્ટર સ્કેલ પર તેની તીવ્રતા ૬.૩ માપવામાં આવી હતી. આ શક્તિશાળી ભૂકંપથી સમગ્ર પ્રદેશમાં ગભરાટ ફેલાયો હતો, જેના કારણે લોકો ભયભીત થઈને પોતાના ઘરો અને ઓફિસો છોડીને ભાગી ગયા હતા. ભૂકંપનું કેન્દ્રબિંદુ હેક્સી પ્રાંતમાં હતું. ચીની વહીવટીતંત્રે તાત્કાલિક બચાવ અને રાહત ટીમોને એલર્ટ પર રાખી હતી. માત્ર ૪૦ મિનિટમાં આ વિસ્તારમાં આઠ જાેરદાર ભૂકંપ અનુભવાયા હતા. વારંવાર આવતા ભૂકંપ બચાવ અને રાહત કાર્યકરો માટે નોંધપાત્ર મુશ્કેલીઓ ઊભી કરી રહ્યા છે. આ સતત આફ્ટરશોક્સને કારણે લોકો ભયમાં જીવી રહ્યા છે. હેક્સી પ્રાંતમાં આવેલા શક્તિશાળી ભૂકંપમાં એક વ્યક્તિનું મોત થયું છે. અન્ય ચાર લોકો ગંભીર રીતે ઘાયલ થયા છે. સિસ્મોલોજીકલ ઓબ્ઝર્વેટરીના જણાવ્યા અનુસાર, ભૂકંપ સ્થાનિક સમય મુજબ સાંજે ૫:૦૬ વાગ્યે આવ્યો હતો.