અમેરિકી વિદેશ મંત્રી માર્કો રુબિયોએ શનિવારે વડાપ્રધાન નરેન્દ્ર મોદી સાથે સેવા તીર્થમાં મુલાકાત કરી હતી. આ દરમિયાન તેમણે અમેરિકી રાષ્ટ્રપતિ ડોનાલ્ડ ટ્રમ્પ તરફથી પીએમ મોદીને અમેરિકા આવવાનું આમંત્રણ આપ્યું.

મીડિયા રિપોર્ટ અનુસાર મોદી અને રુબિયો વચ્ચે ૧ કલાકથી વધુ સમય સુધી બેઠક ચાલી. આ બેઠકમાં વિદેશ મંત્રી એસ જયશંકર ઉપરાંત એનએસએ અજીત ડોભાલ પણ હાજર રહ્યા. આ દરમિયાન અમેરિકા અને ભારત વચ્ચે સુરક્ષા, વેપાર અને મહત્વપૂર્ણ તકનીકોના ક્ષેત્રમાં સહયોગને વધુ ગાઢ બનાવવા પર ચર્ચા થઈ.

રુબિયોની આ યાત્રા અમેરિકી રાષ્ટ્રપતિ ટ્રમ્પના ચીન પ્રવાસના માત્ર ૭ દિવસ પછી થઈ રહી છે. આવા સમયે અમેરિકી મીડિયાનું કહેવું છે કે રુબિયોની આ યાત્રા માત્ર રાજદ્વારી જ નહીં પરંતુ ડેમેજ કંટ્રોલ મિશન પણ છે. ન્યૂયોર્ક ટાઈમ્સ અનુસાર ટ્રમ્પની તાજેતરની ચીન યાત્રાએ એશિયાની રાજનીતિમાં નવી બેચેની પેદા કરી દીધી છે. બીજિંગમાં ટ્રમ્પે ચીની રાષ્ટ્રપતિ શી જિનપિંગની ખુલ્લેઆમ પ્રશંસા કરી. તેમણે જિનપિંગને મહાન નેતા અને ખાસ મિત્ર ગણાવ્યા.ભારત-અમેરિકામાં ૧ વર્ષથી તણાવ ચાલુ રૂબિયોની આ મુલાકાત એવા સમયે થઈ રહી છે જ્યારે ગયા વર્ષના મધ્યથી ભારત-અમેરિકા સંબંધોમાં કેટલાક મુદ્દાઓને લઈને તણાવ જાેવા મળ્યો હતો. માનવામાં આવે છે કે આ યાત્રાનો હેતુ બંને દેશોના સંબંધોને ફરીથી મજબૂત કરવાનો પણ છે. હવે દિલ્હીમાં રૂબિયોની વાતચીતનો સૌથી મોટો હેતુ એ જ માનવામાં આવે છે કે ભારત એ સમજી શકે કે ટ્રમ્પ સરકાર એશિયામાં આગળ શું રણનીતિ અપનાવવાની છે અને ચીન સાથે તેના સંબંધોની દિશા શું હશે.

ગયા વર્ષે ટ્રમ્પે ભારત પર ભારે ટેરિફ લગાવ્યા હતા કારણ કે વડાપ્રધાન મોદીએ તેમને નોબેલ શાંતિ પુરસ્કાર માટે નામાંકિત કરવાનો ઇનકાર કર્યો હતો. ટ્રમ્પનો દાવો હતો કે તેમણે ભારત-પાકિસ્તાન વચ્ચે સંઘર્ષ રોકવામાં મોટી ભૂમિકા ભજવી હતી, પરંતુ ભારતે જાહેરમાં આ દાવાને નકારી કાઢ્યો હતો.