વેનેઝુએલામાં આવેલા શક્તિશાળી ભૂકંપે દુનિયાનું ધ્યાન ખેંચ્યું. એક ચોંકાવનારો ખુલાસો થયો. ઘણા લોકોએ દાવો કર્યો હતો કે તેમને ભૂકંપ અનુભવાય તેની થોડી સેકન્ડ પહેલા જ તેમના એન્ડ્રોઇડ ફોન પર ગુગલ એલર્ટ મળ્યું હતું. એ પ્રશ્ન થવો સ્વાભાવિક છે કે ગુગલને ભૂકંપ વિશે અગાઉથી માહિતી કેવી રીતે મળી. શું કંપની ખરેખર ભૂકંપની આગાહી કરી શકે છે? બુધવારે, વેનેઝુએલામાં બે શક્તિશાળી ભૂકંપ આવ્યા, જેની તીવ્રતા ૭.૧ અને ૭.૫ હતી. અહેવાલો સૂચવે છે કે આ લગભગ ૧૦૦ વર્ષમાં દેશમાં આવેલા સૌથી શક્તિશાળી ભૂકંપોમાંના એક છે. ભૂકંપે અસંખ્ય ઇમારતોને નુકસાન પહોંચાડ્યું અને ઘણા વિસ્તારોમાં ગભરાટ ફેલાવ્યો. ભૂકંપ પછી, ઘણા વપરાશકર્તાઓએ સોશિયલ મીડિયા પ્લેટફોર્મ Xપર સ્ક્રીનશોટ શેર કર્યા, જેમાં ગૂગલ દ્વારા મોકલવામાં આવેલ ભૂકંપ ચેતવણી દર્શાવવામાં આવી. એક વપરાશકર્તાને એક સૂચના મળી જેમાં તેમને જણાવવામાં આવ્યું હતું કે લગભગ ૩૪૧ કિલોમીટર દૂર ૬.૨ ની તીવ્રતાનો ભૂકંપ નોંધવામાં આવ્યો છે. આ ચેતવણી ભૂકંપ અનુભવાય તે પહેલાં લોકો સુધી પહોંચી હતી. ગુગલની ભૂકંપ ચેતવણી સિસ્ટમ જાદુ કે આગાહી પર આધાર રાખતી નથી. તે તમારા સ્માર્ટફોનમાં એક્સીલેરોમીટર નામના ખાસ સેન્સર દ્વારા સંચાલિત છે. આ સેન્સર ફોન ખસેડતી વખતે સ્ક્રીનને આપમેળે ફરવામાં મદદ કરે છે, પરંતુ તે જમીનમાં કંપનો પણ અનુભવી શકે છે. જ્યારે એન્ડ્રોઇડ ફોનનું એક્સીલેરોમીટર અસામાન્ય કંપનો શોધે છે, ત્યારે તે ગૂગલના સર્વર્સને સિગ્નલ મોકલે છે, જે ફોનનું અંદાજિત સ્થાન શેર કરે છે. ત્યારબાદ ગૂગલ નજીકના અન્ય એન્ડ્રોઇડ ફોનમાંથી ડેટાની તપાસ કરે છે. જાે મોટી સંખ્યામાં ફોન સમાન વિસ્તારમાં સમાન કંપનો રેકોર્ડ કરે છે, તો સિસ્ટમ સમજે છે કે ભૂકંપ આવી રહ્યો છે.