દિલ્હી-

કોરોના મહામારી વચ્ચે પણ દેશમાં અર્થતંત્રની ગાડી પણ પૂરપાટ દોડતી હોવાના કેટલાક પ્રોત્સાહક આંકડા સામે આવ્યા છે. એપ્રિલમાં જીએસટી કલેક્શન રેકોર્ડ 1.41 લાખ કરોડ પર પહોંચ્યું છે. અગાઉ માર્ચ મહિનામાં જીએસટી વસૂલાત રૂ. 1.23 લાખ કરોડ રહી હતી. ગત વર્ષે કોરોનાની પ્રથમ લહેરમાં કેન્દ્ર સરકારે લાગુ કરેલા લોકડાઉન બાદ ઉભરી રહેલા અર્થતંત્ર માટે આ સારા સમાચાર છે. મહામારીના સમયગાળા વચ્ચે આ સતત પાંચમી વખત જીએસટી કલેક્શન 1.1 લાખ કરોડથી ઉપર રહ્યું છે.

એપ્રિલ માસમાં જીએસટી વસૂલાત રૂ.1,41,384 કરોડ થઈ હતી જે પૈકી સીજીએસટી રૂ. 27,837 કરોડ અને સીજીએસટી હિસ્સો રૂ. 35,621 કરોડ હતો તેમજ સેસ રૂ. 9,455 કરોડ હતી. જીએસટી લાગુ થયા પછી એપ્રિલ 2021માં આ સૌથી વધુ જીએસટી કલેક્શન છે. વિતેલા છ મહિનાથી જીએસટી કલેક્શનમાં વધારાનો ટ્રેન્ડ જોવા મળે છે. એપ્રિલમાં જીએસટી કલેક્શન માર્ચ કરતા 14 ટકા વધુ રહ્યું હતું. સ્થાનિક ટ્રાન્ઝેક્શનથી મળેલી આવક ગત મહિનાથી 21 ટકા વધુ રહી હતી.