કચ્છ જિલ્લાના ભુજ નજીક આવેલા માધાપરમાં ધાર્મિક પ્રસંગ દરમિયાન આયોજિત બટુક ભોજનમાં ફૂડ પોઇઝનિંગ જેવી ઘટના સામે આવતા ભારે દોડધામ મચી ગઈ હતી. છાશ પીધા બાદ ૪૫થી વધુ બાળકોની તબિયત એકાએક બગડતાં તેમને તાત્કાલિક હોસ્પિટલમાં ખસેડવાની ફરજ પડી હતી. મળતી માહિતી અનુસાર, માધાપરના ઐશ્વર્યા નગર વિસ્તારમાં સ્થિત એક મંદિરમાં અધિક માસની પૂર્ણાહુતિ નિમિત્તે વિશેષ ધાર્મિક કાર્યક્રમનું આયોજન કરવામાં આવ્યું હતું. આ પ્રસંગે બાળકો માટે બાલ ભોજનનું આયોજન કરવામાં આવ્યું હતું, જેમાં આસપાસના વિસ્તારના ૫૦થી વધુ બાળકો જાેડાયા હતા. પ્રાથમિક માહિતી મુજબ, ભોજન દરમિયાન પીરસવામાં આવેલી છાશ પીધાના થોડા સમય બાદ બાળકોને પેટમાં દુ:ખાવો, ઉલ્ટી, ચક્કર અને ઝાડા જેવી તકલીફો શરૂ થઈ હતી. એકસાથે મોટી સંખ્યામાં બાળકો બીમાર પડતાં સ્થળ પર અફરાતફરીનો માહોલ સર્જાયો હતો. સ્થાનિક લોકો અને વાલીઓએ તાત્કાલિક આયોજકોને જાણ કરી હતી, જેના પગલે બાળકોને હોસ્પિટલ પહોંચાડવાની કાર્યવાહી શરૂ કરવામાં આવી હતી.પ્રાથમિક તપાસમાં એવી શક્યતા વ્યક્ત કરવામાં આવી રહી છે કે છાશ બનાવવા માટે ઉપયોગમાં લેવાયેલ દહીં લાંબા સમય સુધી યોગ્ય ઠંડક વિના રાખવામાં આવ્યું હોઈ શકે છે. ઉનાળાની ગરમી અને ભેજવાળા વાતાવરણના કારણે દહીં બગડી ગયું હોવાની આશંકા વ્યક્ત કરવામાં આવી રહી છે. જાે કે ઘટનાના ચોક્કસ કારણ અંગે સત્તાવાર તપાસ બાદ જ સ્પષ્ટતા થઈ શકશે.ઘટનાની ગંભીરતાને ધ્યાનમાં રાખીને તમામ અસરગ્રસ્ત બાળકોને ભુજની જી.કે. જનરલ હોસ્પિટલ ખાતે ખસેડવામાં આવ્યા હતા. હોસ્પિટલ દ્વારા તાત્કાલિક ઇમરજન્સી સારવાર શરૂ કરવામાં આવી હતી અને બાળરોગ નિષ્ણાતોની વિશેષ ટીમને તૈનાત કરવામાં આવી હતી.હોસ્પિટલ સૂત્રોના જણાવ્યા અનુસાર સમયસર સારવાર મળી જતા હાલ તમામ બાળકોની સ્થિતિ સ્થિર છે અને કોઈ ગંભીર જાેખમ હોવાનું સામે આવ્યું નથી.ઘટનાને લઈને આરોગ્ય વિભાગ અને સંબંધિત તંત્ર દ્વારા પણ જરૂરી તપાસ હાથ ધરવામાં આવી છે. ભોજનમાં ઉપયોગમાં લેવાયેલા ખાદ્યપદાર્થોના નમૂનાઓની તપાસ કરીને ફૂડ પોઇઝનિંગનું ચોક્કસ કારણ જાણવા પ્રયાસ કરવામાં આવશે.આ ઘટના બાદ સ્થાનિક સ્તરે ધાર્મિક અને સામૂહિક કાર્યક્રમોમાં પીરસાતા ખોરાકની ગુણવત્તા અને સુરક્ષા અંગે પણ ચર્ચા શરૂ થઈ છે.