ઇસ્લામાબાદ,પાકિસ્તાનના રહીમ યાર ખાન એરબેઝનો રનવે હજુ કાર્યરત થયો નથી. ૧૦ મેના રોજ ઓપરેશન સિંદૂર દરમિયાન ભારત દ્વારા આ એરપોર્ટને નિશાન બનાવવામાં આવ્યું હતું, જેમાં તેને નુકસાન થયું હતું. ત્યારથી, એરપોર્ટ કામગીરી માટે બંધ છે અને બંધનો સમયગાળો હવે લંબાવવામાં આવ્યો છે. પાકિસ્તાન સિવિલ એવિએશન ઓથોરિટી દ્વારા એરમેનને બીજી એક નોટિસ જારી કરવામાં આવી છે, જે મુજબ રનવે હવે ઓછામાં ઓછા ૬ ઓગસ્ટના રોજ સવારે ૪:૪૯ વાગ્યા સુધી (ભારતીય સમય મુજબ સવારે ૫:૨૯ વાગ્યા સુધી) બંધ રહેશે. ભારત અને પાકિસ્તાન વચ્ચે ચાલી રહેલા સંઘર્ષ દરમિયાન, પાકિસ્તાને એક નોટમ જારી કરીને કહ્યું હતું કે એરબેઝનો રનવે એક અઠવાડિયા સુધી ફ્લાઇટ ઓપરેશન માટે ઉપલબ્ધ રહેશે નહીં. આ પછી, આ રનવેના ઉદઘાટન માટે ઘણી તારીખો આપવામાં આવી હતી પરંતુ તે હજુ સુધી શરૂ થયો નથી. બીજાે નોટામ ૪ જૂને જારી કરવામાં આવ્યો હતો, જેમાં બંધ ૪ જુલાઈ સુધી લંબાવવામાં આવ્યો હતો. રહીમ યાર ખાન એરબેઝ ઉપરાંત, શેખ ઝાયેદ આંતરરાષ્ટ્રીય એરપોર્ટ પણ અહીં આવેલું છે. પહેલગામમાં પ્રવાસીઓ પર થયેલા હુમલા બાદ ભારત દ્વારા નિશાન બનાવવામાં આવેલા ૧૧ સ્થળોમાં રહીમ યાર ખાન એરબેઝનો પણ સમાવેશ કરવામાં આવ્યો હતો. પહેલગામ આતંકવાદી હુમલામાં ૨૬ લોકો માર્યા ગયા હતા. આ પછી, ભારતે પાકિસ્તાનમાં ઘણી જગ્યાએ હુમલો કર્યો. આ હુમલા પછી, પાકિસ્તાને ભારત સાથે યુદ્ધવિરામ કરાર માટે વાટાઘાટો કરવી પડી.