નારોલ પોલીસ સ્ટેશન વિસ્તારમાં રહેતી ૨૭ વર્ષીય પરિણીતાએ નોકરી કરવાની ના પાડતાં એ કયુવકે અદાવત રાખી તેના પતિને ફોન પર બિભત્સ વાતો કરી ગંભીર આક્ષેપો કર્યા હોવાની ઘટના સામે આવી છે. આરોપીએ પરિણીતાના પતિને ફોન કરીને “તારી પત્ની સુઈ ગઈ હોય તો ફોટો પાડીને મોકલ” તથા “તે મારી સાથે હોટલમાં આવતી હતી” જેવા વાંધાજનક નિવેદનો આપી દંપતીના સંસારમાં તિરાડ પાડવાનો પ્રયાસ કર્યો હતો. આ મામલે પરિણીતાની ફરિયાદ ના આધારે નારોલ પોલીસે કીરીટભાઈ ચાવડા નામના શખ્સ સામે ગુનો નોંધી વધુ તપાસ હાથ ધરી છે. નારોલમાં ૨૭ વર્ષીય પરિણીતા તેના પતિ સહિત ના પરિવાર સાથે રહે છે. થોડા મહિનાઓ અગાઉ નોકરીની જરૂરિયાત હોવાથી તેમણે પરિચિત મારફતે બાયોડેટા મોકલાવ્યો હતો. જે-તે સમયે આરોપી કીરીટ ચાવડાએ તેમને મેમનગર ખાતે એક સ્થળે બેબી કેરની નોકરીની ઑફર કરી હતી. જાેકે, કામના કલાકો અનુકૂળ ન હોવાથી પરિણીતાએ તે નોકરી કરવાની સ્પષ્ટ ના પાડી દીધી હતી અને ત્યારબાદ પોતાની રીતે ખાનગી સંસ્થામાં સુપરવાઈઝર તરીકે નોકરી મેળવી લીધી હતી. ત્યારબાદ સપ્ટેમ્બર મહિનામાં આરોપીએ ફરીથી નોકરી સંદર્ભે મેસેજ કરી સંપર્ક કરવાનો પ્રયાસ કર્યો હતો, પરંતુ પરિણીતાએ પોતે નોકરી શોધી લીધી હોવાનું કહી વાત પૂર્ણ કરી હતી. આમ છતાં, ઓક્ટોબર મહિનાની શરૂઆતમાં આરોપીએ રાત્રિના સમયે પરિણીતાના મોબાઈલ પર વારંવાર કોલ કરીને જેમતેમ બોલવાનું શરૂ કર્યું હતું.