રિલાયન્સ ગ્રુપના ચેરમેન અનિલ અંબાણી આજે ૧૭,૦૦૦ કરોડ રૂપિયાના કથિત બેંક લોન છેતરપિંડીના કેસમાં એન્ફોર્સમેન્ટ ડિરેક્ટોરેટ (ED) સમક્ષ હાજર થયા છે. દિલ્હી સ્થિત EDના મુખ્યાલયમાં મની લોન્ડરિંગ એક્ટ (PMLA) હેઠળ તેમની પૂછપરછ કરવામાં આવી રહી છે અને તેમનું નિવેદન પણ રેકોર્ડ કરવામાં આવી રહ્યું છે.

શું છે સમગ્ર મામલો?

ED દ્વારા ગયા મહિને રિલાયન્સ ગ્રુપ સાથે સંબંધિત ૩૫ સ્થળોએ દરોડા પાડવામાં આવ્યા હતા, જે પછી આ તપાસ શરૂ થઈ હતી. તપાસનું મુખ્ય ફોકસ રિલાયન્સ ઇન્ફ્રાસ્ટ્રક્ચર અને તેની સાથે જોડાયેલી કંપનીઓ પર છે. આ કંપનીઓ પર ઇન્ટર-કોર્પોરેટ ડિપોઝિટ (ICD) ના નામે બેંકો પાસેથી હજારો કરોડ રૂપિયાની લોન લઈને તેનો અન્ય કંપનીઓમાં ડાયવર્ઝન કરવાનો આરોપ છે.

સૂત્રોના જણાવ્યા અનુસાર, આ વ્યવહારોમાં 'CLE' નામની એક કંપનીનો ઉપયોગ કરવામાં આવ્યો હતો, જેને રિલાયન્સ ઇન્ફ્રાસ્ટ્રક્ચર દ્વારા "સંબંધિત પક્ષ" તરીકે જાહેર કરવામાં આવી નહોતી. આનાથી કંપનીએ શેરધારકો અને ઓડિટ સમિતિની મંજૂરી મેળવવાની પ્રક્રિયાને ટાળી દીધી હતી.

બેંકો અને અન્ય આરોપીઓ પર પણ કાર્યવાહી

EDએ આ કેસમાં ૩૯ બેંકોને પણ નોટિસ મોકલીને પૂછ્યું છે કે તેઓ લોન મોનિટરિંગમાં શા માટે નિષ્ફળ રહી. એજન્સીએ જણાવ્યું કે જ્યારે કંપનીઓ ડિફોલ્ટ થવા લાગી, ત્યારે પણ બેંકો દ્વારા કોઈ ચેતવણી જારી કરવામાં આવી નહોતી. આ મામલે પ્રથમ ધરપકડ પણ થઈ ચૂકી છે. બિસવાલ ટ્રેડલિંક પ્રાઇવેટ લિમિટેડના MD પાર્થ સારથી બિસવાલની ૧ ઓગસ્ટના રોજ ધરપકડ કરવામાં આવી હતી, જેના પર રિલાયન્સ પાવર માટે ૬૮.૨ કરોડ રૂપિયાની નકલી બેંક ગેરંટી તૈયાર કરવાનો આરોપ છે. ED હવે બેંક અધિકારીઓને પણ પૂછપરછ માટે બોલાવવાની તૈયારી કરી રહી છે.