મુંબઈના થાણે ખાતે કૌટુંબિક પ્રસંગ પૂર્ણ કરીને અમદાવાદ પરત ફરી રહેલા વટવાના પરિવારની ખાનગી ટ્રાવેલ્સની બસમાંથી અંદાજે રૂ. ૩.૦૮ લાખની કિંમતના સોના-ચાંદીના દાગીના અને રોકડ ભરેલી બેગની ચોરી થવાની ઘટના સામે આવી છે. ગત ૫ ઓક્ટોબરની રાત્રે ગોડબંદરથી એચ.કે ટ્રાવેલ્સની બસમાં સવાર થયેલા પરિવારે કંડક્ટરના કહેવાથી બેગ સીટ નીચે મૂકી હતી, પરંતુ બીજા દિવસે સવારે સીટીએમ એક્સપ્રેસ હાઈવે ખાતે ઉતરતાં જ એક બેગ ગાયબ હોવાનું જણાયું હતું. આ મામલે રામોલ પોલીસ મથકે અજાણ્યા તસ્કર વિરુદ્ધ ગુનો નોંધી તપાસ શરૂ કરી છે. શહેરના વટવા ખાતે ગોલ્ડન સિનેમા પાછળ નૂરનગર, શાહે આલમ ફ્લેટમાં રહેતા અને નારોલમાં મેટ્રો સ્ટીલના કારખાનામાં વેલ્ડર તરીકે નોકરી કરતા મોહમ્મદ હસન મુવીન કુરેશી પોતાના પરિવારજનો સાથે ગત ૩૦ સપ્ટેમ્બરના રોજ બહેન મુસ્કાનના ઘરે થાણે પ્રસંગમાં ગયા હતા. પ્રસંગ પતાવીને તા. ૫ ઓક્ટોબર ૨૦૨૬ના રોજ રાત્રે આશરે સાડા સાત વાગ્યે પરિવાર ગોડબંદર બોમ્બે ફાઉન્ટેન હોટેલ હાઈવે પરથી શ્રી એચ.કે ટ્રાવેલ્સની બસમાં અમદાવાદ આવવા બેઠો હતો. પરિવારે નવ બેગ બસની ડિક્કીમાં મૂકવા માટે અમિત નામના કંડક્ટરને જણાવ્યું હતું, પરંતુ કંડક્ટરે ડિક્કીમાં બેગ રાખવાની ના પાડી સીટની નીચે રાખવા જણાવ્યું હતું. મુસાફરી દરમિયાન બસ મહારાષ્ટ્રના મનોર ખાતે ન્યૂ દર્શન હોટેલ, વાપી ખાતે પાર્સલ ઉતારવા અને વહેલી સવારે કરજણ ટોલટેક્સ પાસે પોર ગામની ગેલેક્સી હોટેલ ખાતે રોકાઈ હતી.