કારના ચાલકે કાબૂ ગુમાવતા કાર ડિવાઈડર સાથે અથડાઈને પલટી ખાઈ ગઈ

આણંદ-પેટલાદ હાઇવે પર રામોદડી ઓવરબ્રિજ નજીક ગમખ્વાર અકસ્માત સર્જાયો હતો. આ અકસ્માતમાં વાસદથી તારાપુર તરફ જઈ રહેલી એક કારના ચાલકે અચાનક કાબૂ ગુમાવતા કાર ડિવાઈડર સાથે ધડાકાભેર અથડાઈને પલટી ખાઈ ગઈ હતી. આ અકસ્માતમાંઆખી કારનો કચ્ચરઘાણ વળી ગયો હતો.આ ગંભીર અકસ્માતમાં કારમાં સવાર ત્રણ પૈકી બેના ઘટના સ્થળે જ કરૂણ મોત નિપજ્યા છે, જ્યારે એક વ્યક્તિ ગંભીર રીતે ઇજાગ્રસ્ત થઈ છે. અકસ્માત એટલો ભયંકર હતો કે, કારના દરવાજા અને પતરા કાપીને મૃતદેહોને બહાર કાઢવા પડ્યાં હતા.

સ્થાનિક રહીશોએ પોલીસ અને એમ્બ્યુલન્સને જાણ કરતા પોલીસ કાફલો ઘટના સ્થળે દોડી આવ્યો હતો. ઇજાગ્રસ્ત વ્યક્તિને તાત્કાલિક નજીકની હોસ્પિટલમાં ખસેડવામાં આવ્યા છે. અકસ્માતની આ ઘટનાને પગલે હાઈવે પર કેટલોક સમય ટ્રાફિક જામ થઈ ગયો હતો.