ફ્રેન્ચાઇઝ T20 લીગમાં નવી શરૂઆત કરે તેવી શક્યતાં

ભારતીય ક્રિકેટના અનુભવી ઓફ સ્પિનર રવિચંદ્રન અશ્વિને આંતરરાષ્ટ્રીય ક્રિકેટ અને IPLમાંથી નિવૃત્તિ લીધા બાદ, તે હવે ફ્રેન્ચાઇઝ T20 લીગમાં નવી શરૂઆત કરી શકે છે. અહેવાલ મુજબ અશ્વિન UAEમાં યોજાનારી ILT20 લીગમાં ભાગ લેવાની તૈયારી કરી રહ્યો છે, જે 2 ડિસેમ્બરથી શરૂ થશે અને 4 જાન્યુઆરી સુધી રમાશે.

ILT20 આયોજકો અને અશ્વિન વચ્ચે વાતચીત ચાલી રહી છે. આ વર્ષે, પહેલીવાર, લીગે ડ્રાફ્ટને બદલે હરાજી પ્રક્રિયા શરૂ કરી છે. ખેલાડીઓની નોંધણી હજુ પણ ચાલુ છે અને નામ મોકલવાની છેલ્લી તારીખ 10 સપ્ટેમ્બર નક્કી કરવામાં આવી છે. આ પછી, ખેલાડીઓની હરાજી 30 સપ્ટેમ્બરે દુબઈમાં યોજાવાની છે.

જો અશ્વિનને કોઈપણ ટીમ દ્વારા ખરીદવામાં આવે છે, તો તે આ લીગમાં રમનાર સૌથી મોટો ભારતીય ક્રિકેટર હશે. અગાઉ, રોબિન ઉથપ્પા અને યુસુફ પઠાણને ટીમો દ્વારા પસંદ કરવામાં આવ્યા હતા, પરંતુ તેમને ડેબ્યૂ કરવાની તક મળી ન હતી. અંબાતી રાયડુ એકમાત્ર ભારતીય છે જે ILT20 માં રમ્યો છે. રાયડુએ MI અમીરાત માટે આઠ મેચ રમી હતી.

ડિસેમ્બર 2024 માં બોર્ડર-ગાવસ્કર ટ્રોફી દરમિયાન અશ્વિને અચાનક આંતરરાષ્ટ્રીય ક્રિકેટમાંથી નિવૃત્તિ લઈ લીધી. ટેસ્ટમાં તેની પાસે 537 વિકેટ છે, જે વિશ્વ ક્રિકેટમાં સૌથી વધુ વિકેટ લેવાની યાદીમાં સાતમા ક્રમે છે.