મંગળવારે વહેલી સવારે ભારે વરસાદને કારણે આવેલા અચાનક પૂરે જમ્મુ અને કાશ્મીરના ડોડા જિલ્લાના થથરી શહેરમાં ભારે તબાહી મચાવી દીધી. રાત્રિના અંધારામાં આવેલી આ આફતથી રહેવાસીઓ અવાચક થઈ ગયા. કાટમાળ, મોટા પથ્થરો અને ખડકો ટેકરીઓ પરથી નીચે ધસી પડ્યા, જેના કારણે રસ્તામાં અનેક ઘરો, દુકાનો અને વાહનોને નુકસાન થયું. જ્યારે લોકો સવારે ઉઠ્યા ત્યારે તેમને ભારે વિનાશનો સામનો કરવો પડ્યો. રસ્તાઓ કાટમાળથી ભરાઈ ગયા હતા, અને ઘણા વાહનો કાદવ અને ખડકો નીચે દટાઈ ગયા હતા. સ્થાનિક લોકો કહે છે કે કેટલાક વાહનો જાેરદાર પ્રવાહથી તણાઈ ગયા હતા અને ચિનાબ નદીમાં પહોંચી ગયા હતા. જાેકે, કોઈ જાનહાનિના અહેવાલ નથી. અચાનક પૂરથી થાથરી નજીક ડોડા-કિશ્તવાર રાષ્ટ્રીય ધોરીમાર્ગ પણ બંધ થઈ ગયો હતો, જેના કારણે બંને જિલ્લાઓ વચ્ચેનો વાહનવ્યવહાર ખોરવાઈ ગયો હતો. માહિતી મળતાં, જિલ્લા વહીવટીતંત્ર, પોલીસ અને અન્ય એજન્સીઓની ટીમો ઘટનાસ્થળે પહોંચી અને કાટમાળ સાફ કરવાનું અને રસ્તો ફરીથી ખોલવાનું શરૂ કર્યું. ડોડાના ડેપ્યુટી કમિશનર કૃષ્ણ લાલે જણાવ્યું હતું કે જિલ્લામાં ભારે વરસાદને કારણે, ટેકરીઓ પરથી કાટમાળ અને પથ્થરો અનેક સ્થળોએ રસ્તા પર પડ્યા હતા. વહીવટીતંત્રે તાત્કાલિક કાર્યવાહી કરી, અસરગ્રસ્ત રસ્તાઓ સાફ કર્યા અને ટ્રાફિક પુન:સ્થાપિત કર્યો.તેમણે લોકોને અફવાઓ પર ધ્યાન ન આપવા વિનંતી કરી, એમ કહીને કે આ ઘટના વાદળ ફાટવાથી નહીં પણ ભારે વરસાદને કારણે થઈ છે. તેમણે ઉમેર્યું હતું કે વહીવટીતંત્ર સંપૂર્ણપણે સતર્ક છે અને કોઈપણ કટોકટીની તૈયારી માટે પરિસ્થિતિ પર સતત નજર રાખી રહ્યું છે. લોકોને જિલ્લા વહીવટીતંત્ર અથવા કંટ્રોલ રૂમ સાથે કોઈપણ માહિતીની પુષ્ટિ કરવા વિનંતી કરવામાં આવી છે.