ન્યૂ દિલ્હી

વર્લ્ડ બેડમિંટન ફેડરેશન (બીડબ્લ્યુએફ) એ મંગળવારે જાહેરાત કરી કે ભારત ૨૦૨૬ માં વર્લ્ડ બેડમિંટન ચેમ્પિયનશીપનું‌ આયોજન કરશે. ૨૦૨૩ માં ભારત સુદિમન કપનું આયોજન કરશે તેવું હતું, પરંતુ બીડબ્લ્યુએફએ આ વર્લ્ડ મિક્સ્ડ ટીમ ચેમ્પિયનશિપનું હોસ્ટિંગ ચીનને સોંપવાનું નક્કી કર્યું છે. બીડબ્લ્યુએફએ ચીનના કોવિડ-૧૯ પરિસ્થિતિને ધ્યાનમાં રાખીને આ વર્ષના સુદિમન કપને ચીનના શુઝોઉને બદલે ફિનલેન્ડના વાંટામાં યોજવાનું નક્કી કર્યું છે.

રમતની ટોચની સંસ્થાએ એક પ્રકાશનમાં જણાવ્યું હતું કે શુઝૌ હવે ૨૦૨૩ માં બીડબ્લ્યુએફ વર્લ્ડ મિક્સ્ડ ટીમ ચેમ્પિયનશીપનું આયોજન કરશે, જે અગાઉ ભારતને સોંપવામાં આવી હતી. ભારતે ૨૦૨૬ માં બીડબ્લ્યુએફ વર્લ્ડ ચેમ્પિયનશિપનું આયોજન કરવાનું સ્વીકાર્યું છે.

આ બીજી વખત થશે જ્યારે ભારત વર્લ્ડ ચેમ્પિયનશીપનું આયોજન કરશે. અગાઉ આ પ્રતિષ્ઠિત સ્પર્ધાનું આયોજન ૨૦૦૯ માં હૈદરાબાદમાં કરવામાં આવ્યું હતું. બેડમિંટન એસોસિએશન ઓફ ઈન્ડિયા (બીએઆઈ) ના પ્રમુખ હિમંતા બિસ્વા સરમાએ જણાવ્યું હતું કે, “વર્લ્ડ ચેમ્પિયનશિપ જેવી સ્પર્ધા યોજવી એ બેડમિંટન એસોસિએશન ઓફ ઇન્ડિયા અને દેશ માટે મોટી સિદ્ધિ છે. "

ઓલમ્પિકની તૈયારી કરી રહેલ પીવી સિંધુ હાલમાં મહિલા સિંગલ્સમાં વર્લ્ડ ચેમ્પિયન છે. સિંધુએ આ સ્પર્ધામાં બે રજત અને બે કાંસ્ય પદક પણ જીત્યા છે. બી સાઈ પ્રણીથે સ્વિટ્‌ઝર્લૅન્ડના બેસલમાં પુરુષ સિંગલ્સમાં વર્લ્ડ ચેમ્પિયનશીપ મેડલ જીતીને ૩૬ વર્ષ લાંબી રાહ જોવી સમાપ્ત કરી હતી. સાઇના નેહવાલે ૨૦૧૫ અને ૨૦૧૭ માં અનુક્રમે સિલ્વર અને બ્રોન્ઝ જીત્યો હતો જ્યારે અશ્વિની પોનાપ્પા અને જ્વાલા ગુટ્ટાએ ૨૦૧૧ માં લંડનમાં મહિલા ડબલ્સમાં બ્રોન્ઝ જીત્યો હતો.